یوم آزادی ہمیں بزرگوں کی ان گنت قربانیوں کی یاد دلاتا ہے جنہوں نے آزاد اور خودمختار وطن دلانے کے لیے بے مثال جدوجہد کی ،وفاقی وزیر میاں ریاض حسین پیرزادہ

جمعرات 14 اگست 2025 14:47

اسلام آباد (اُردو پوائنٹ اخبارتازہ ترین - اے پی پی۔ 14 اگست2025ء) وفاقی وزیر برائے ہاؤسنگ و تعمیرات میاں ریاض حسین پیرزادہ نے یومِ آزادی کے موقع پر ملک کے اندر اور بیرون ملک مقیم تمام پاکستانیوں کو دل کی گہرائیوں سے مبارکباد پیش کی ہے۔یہاں جاری بیان میں انہوں نے کہا کہ یہ تاریخی دن ہمیں ہمارے بزرگوں کی ان گنت قربانیوں کی یاد دلاتا ہے جنہوں نے ہمیں ایک آزاد اور خودمختار وطن دلانے کے لیے بے مثال جدوجہد کی تاکہ ہم عزت، انصاف اور آزادی کے ساتھ زندگی گزار سکیں، یہ دن ہمیں یاد دلاتا ہے کہ ہماری آزادی مسلسل جدوجہد، اتحاد اور غیر متزلزل ایمان کے نتیجے میں حاصل ہوئی تھی۔

وزیر ہائوسنگ نے زور دیا کہ یہ ہماری اجتماعی ذمہ داری ہے کہ ہم اُن قربانیوں کا احترام کرتے ہوئے ایک مضبوط، خوشحال اور پرامن پاکستان کے لیے انتھک محنت کریں۔

(جاری ہے)

اس بابرکت موقع پر انہوں نے ہر شہری سے خلوص نیت اور لگن کے ساتھ اپنا کردار ادا کرنے کی اپیل کی۔انہوں نے جمہوریت، قانون کی حکمرانی، اور سماجی انصاف کے اصولوں سے وابستگی کو مزید مضبوط کرنے کی ضرورت پر زور دیا۔انہوں نے کہا کہ ہمیں اجتماعی طور پر اپنے چیلنجز کا جواں مردی سے سامنا کرنا ہوگا اور اُنہیں ترقی و خوشحالی کے مواقع میں تبدیل کرنا ہوگا۔اللہ تعالیٰ ہمیں اپنی قوم کی بے لوث خدمت کرنے کی توفیق عطا فرمائے۔\932