ضلعی انتظامیہ مری کے زیرِ اہتمام جشن آزادی کی تقریب کا انعقاد

جمعرات 14 اگست 2025 17:20

راولپنڈی (اُردو پوائنٹ اخبارتازہ ترین - اے پی پی۔ 14 اگست2025ء) پنجاب آرٹس کونسل مری میں پرچم کشائی کی پروقار تقریب کا انعقاد کیا گیا۔ تقریب میں ایم این اے راجہ اسامہ اشفاق سرور، بریگیڈیر سٹیشن کمانڈر مری احمد نواز ، ڈپٹی کمشنر مری آغا ظہیر عباس شیرازی، ڈی پی او مری آصف آمین اعوان، کامران صغیر اے ڈی سی جی، اسسٹنٹ کمشنر مری، ڈسٹرکٹ ایمرجنسی آفیسر سمیت ریسکیو 1122 مری کے اہلکاروں، ضلعی محکموں کے سربراہان، سول سوسائٹی،ضلعی تنظیموں، علماء کرام اور اساتذہ سمیت بڑی تعداد میں شہریوں نے شرکت کی۔

(جاری ہے)

تقریب کے دوران بچوں نے ملی نغموں اور تقاریر کی صورت میں وطن سے محبت کا اظہار کیا۔تقریب سے خطاب کرتے ہوئے ایم این اے اسامہ اشفاق سرور نے قوم اور سامعین کو یوم آزادی کی مبارکباد دی۔اس موقع پر اظہار خیال کرتے ہوئے ان کا کہنا تھا کہ یہ وطن ہمارے بزرگوں کی لازوال جہدوجہد اور قربانیوں کے نتیجے میں معرض وجود میں آیا، قیام پاکستان کے حقیقی مقاصد کے حصول کے لئے لازم ہے کہ ہم بطور قوم اس کی تعمیر و ترقی میں ایمانداری اور جانفشانی سے کردار ادا کرتے رہیں، یہ تجدید عہد کا دن ہے،آج ہم سب عہد کریں کہ ہم وطن کی تعمیر و ترقی کے لئے کسی قسم کی قربانی سے دریغ نہیں کریں گے۔