سب لوگ اختلافات بھلا کر قوم، ملک ،دین کی خاطرایک جھنڈے تلے یکجان ہوں‘ پرویز الٰہی

آزادی پر اللہ تعالی کا جتنا شکر ادا کریں کم ہے، یہی 14اگست کا پیغام اور اصل روح ہے‘ صدر پی ٹی آئی

جمعرات 14 اگست 2025 19:15

لاہور(اُردو پوائنٹ اخبارتازہ ترین - این این آئی۔ 14 اگست2025ء)پاکستان تحریک انصاف کے مرکزی صدر چوہدری پرویز الٰہی نے کہا کہ آج بھارت کے مسلمانوں سے پوچھیں کہ آزادی کتنی بڑی نعمت ہے۔اپنے بیان میں انہوں نے کہا کہ پوری قوم جشن آزادی جوش و جذبے کے ساتھ منا رہی ہے، یہ نہیں بھولنا چاہیے کہ اللہ تعالی نے پاکستان کلمے کی برکت سے نوازا ہے۔

(جاری ہے)

پرویز الٰہی نے کہا کہ سب لوگ اختلافات بھلا کر قوم، ملک اور دین کی خاطر ایک جھنڈے تلے یک جان ہوں، شہیدوں کی قربانی کو یاد رکھیں جنہوں نے قیام پاکستان پر اپنی جانوں کا نذرانہ پیش کیا۔

انہوں نے کہا کہ آزادی پر اللہ تعالی کا جتنا شکر ادا کریں کم ہے، یہی 14 اگست کا پیغام اور اصل روح ہے، دعا کریں کہ معیشت، جنگ یا کرپشن کے خلاف ہر محاذ پر سب اکٹھے ہو جائیں، اس ملک نے انشا اللہ بہت آگے بڑھنا ہے اور ترقی کرنی ہے۔انہوں نے کہا کہ نوجوانوں کو خاص طور پر خراج تحسین پیش کرتا ہوں، وہ بڑی سوچ سمجھ رکھنے والے ہیں، مجھے پوری امید ہے کہ انشا اللہ نوجوان ہی پاکستان کو آگے لے کر جائیں گے۔