معرکہ حق نے آزادی کی خوشیاں بڑھا دیں،جامعہ مظہرالعلوم اتحاد ٹاؤن میں تقریب

جمعہ 15 اگست 2025 17:56

کراچی(اُردو پوائنٹ اخبارتازہ ترین - این این آئی۔ 15 اگست2025ء)جامعہ مظہرالعلوم حمادیہ اتحاد ٹاؤن میں یوم آزادی اور معرکہ حق کی فتح کا جشن کے موقع پر ایک پروقار تقریب کا انعقاد کیا گیا، جس کی نگرانی ناظم تعلیمات مولانا فخرالدین رازی نے کی، تقریب میں وائس چیئرمین بلدیہ ٹاؤن عجب خان سواتی، جے یو آئی ضلع جنوبی کے امیر شیخ الحدیث مولانا نورالحق، ڈائریکٹر فشریز معروف کاروباری شخصیت پرویز احمد دودا، ایس پی بلدیہ جہان خان نیازی، ایس ایچ او اتحاد ٹاؤن انسپکٹر راؤ شبیر، چوکی انچارج لالہ نعیم، جے یو آئی بلدیہ ٹاؤن کے مولانا اسد آغا، قاری اقبال، ڈاکٹر عمران آفریدی، پرائیویٹ اسکولز ایسوسی ایشن کے سر رضا آفریدی، جے یو آئی رہنما مفتی شاہ فیصل برکی، مولانا نصیر اللہ چغرزئی،سینئر صحافی منیر احمد شاہ، لیبر کونسلر اظہرالدین کھوسو، جنرل کونسلر عبدالرؤف کھوسو سمیت جامعہ کے اساتذہ، طلباء اور اہل محلہ کی بڑی تعداد شریک ہوئی۔

(جاری ہے)

تقریب کے بعد جامعہ کے احاطے میں معزز مہمانوں اور منتظمین نے پرچم کشائی کی۔ مدرسہ کے ہونہار طلبہ نے ملی نغمے، نعت، تقاریر اور ٹیبلوز پیش کیے۔مقررین نے کہا کہ معرکہ حق نے قوم میں نیا جوش جگا دیا اور آزادی کی خوشیاں بڑھا دیں، یہ محض عسکری کامیابی نہیں بلکہ نظریاتی فتح ہے،پاکستان بنانے میں علماء کا بنیادی کردار تھا اور پاکستان کو مضبوط بنانے میں بھی مدارس اور علما کا کردار ناگزیر ہے۔آخر میں ملکی سلامتی، ترقی، امن و یکجہتی اور سکیورٹی اداروں کے جوانوں کی حفاظت و شہداء کے درجات کی بلندی کے لیے خصوصی دعا کی گئی۔