ماضی کی نامور اداکارہ و گلوکارہ نگینہ خانم کی 20ویں برسی 24اگست کو منائی جائیگی

نگینہ خانم نے کیریئر کا آغاز بطور گلوکارہ کیا،ایک سو تیس گانے گانے کے ساتھ سو سے زائد فلموں میں بھی کام کیا

ہفتہ 16 اگست 2025 10:40

مکوآنہ (اُردو پوائنٹ اخبارتازہ ترین - این این آئی۔ 16 اگست2025ء)ماضی کی نامور اداکارہ و گلوکارہ نگینہ خانم کی 20ویں برسی 24اگست کو منائی جائے گی۔ نگینہ خانم کا تعلق پشاور سے تھا۔ انہوں نے اپنے فلمی کیریئر کا آغاز بطور گلوکارہ کیا اور مختلف پشتو فلموں کیلئے ایک سو تیس گانے گانے کے علاوہ ایک سو سے زائد فلموں میں بھی کام کیا۔انہیں بطور اداکارہ ایس ایم یوسف نے اپنی فلم ’’اولاد‘‘میں متعارف کرایا ان کے مدمقابل اداکار لہری تھے۔

(جاری ہے)

نگینہ خانم نے کئی پشتو فلموں میں بدرمنیر کی والدہ کا کردار ادا کیا اور اس کردار کے لیے وہ پشتو فلموں کا ایک لازمی حصہ سمجھی جاتی تھیں۔بطور اداکارہ نگینہ خانم کی آخری فلم ’’مہندی والے ہتھ‘‘ تھی۔ نگینہ خانم نے گلوکاری اور اداکاری کے علاوہ خود بھی پانچ فلمیں بنائیں۔ ان میں سے ایک فلم جینے دو اردو زبان جبکہ باقی پشتو میں تھیں۔ نگینہ خانم نے فلم انڈسٹری میں متعدد فلموں میں کردار نبھائے اور انہوں نے کئی اداکاروں کو بھی متعارف کرایا۔ نگینہ خانم کو 24 ستمبر 2003ء میں ان کی رہائشگاہ پر قتل کردیا گیا تھا۔