mپنجاب کے ضمنی انتخابات میں رینجرز تعینات کرنے کا فیصلہ

الیکشن کمیشن نے لاہور، وزیرآباد اور میانوالی میں رینجرز سکیورٹی کیلئے محکمہ داخلہ کو خط لکھا

اتوار 17 اگست 2025 16:55

!لاہور (اُردو پوائنٹ اخبارتازہ ترین - آن لائن۔ 17 اگست2025ء) الیکشن کمیشن آف پاکستان نے پنجاب کے ضمنی انتخابات کے دوران سکیورٹی یقینی بنانے کے لیے رینجرز کی تعیناتی کا فیصلہ کرلیا ہے۔ اس حوالے سے الیکشن کمیشن نے محکمہ داخلہ پنجاب کو خط لکھ کر لاہور، وزیرآباد اور میانوالی میں پولنگ اسٹیشنز کے باہر رینجرز تعینات کرنے کی درخواست کی ہے۔ذرائع کے مطابق الیکشن کمیشن نے فیصلہ کیا ہے کہ پنجاب کے ضمنی انتخابات رینجرز کی سکیورٹی میں کرائے جائیں گے۔

(جاری ہے)

خط میں کہا گیا ہے کہ 17 سے 19 ستمبر تک پولنگ اسٹیشنز کے باہر رینجرز اہلکار تعینات کیے جائیں تاکہ انتخابات کا پُرامن انعقاد یقینی بنایا جاسکے۔ذرائع کے مطابق رینجرز کی تعیناتی آئین کے آرٹیکل 220 کے تحت الیکشن کمیشن کی معاونت کے لیے مانگی گئی ہے۔ این اے 66 وزیرآباد، این اے 129 لاہور اور پی پی 87 میانوالی میں 18 ستمبر کو ضمنی انتخابات شیڈول ہیں۔یاد رہے کہ این اے 129 لاہور کی نشست پی ٹی آئی رہنما میاں اظہر کے انتقال کے باعث خالی ہوئی، این اے 66 وزیرآباد کی نشست پی ٹی آئی رہنما محمد احمد کی نااہلی پر خالی قرار دی گئی جبکہ پی پی 87 میانوالی کی نشست پی ٹی آئی کے ملک احمد خان کی نااہلی کے نتیجے میں خالی ہوئی۔