پی بی اے کوریا کے زیر اہتمام جنوبی کوریا میں جشن آزادی ،معرکہ حق کے حوالے سے شاندار تقریب

اتوار 17 اگست 2025 19:00

گو یانگ سٹی (اُردو پوائنٹ اخبارتازہ ترین - اے پی پی۔ 17 اگست2025ء) جنوبی کوریا میں پاکستانی سفارتخانہ ،پاکستان بزنس ایسوسی ایشن (پی بی اے)کوریا اور سٹوڈنٹ ایسوس ایشن کے تعاون سے جشن آزادی کا رنگا رنگ اور شاندار پروگرام گو یانگ سٹی میں منعقد ہوا،تقریب میں پاکستانی اور کوریائی کمیونٹی نے بڑی تعداد میں شرکت کی۔ گویانگ سٹی سے موصولہ پریس ریلیز کے مطابق تقریب کا آغاز تلاوتِ کلام پاک سے ہوا جس کے بعد نعتِ رسولِ مقبول ﷺ پیش کی گئی۔

تقریب میں دونوں ممالک کے قومی ترانے بھی بجائے گئے جنہیں حاضرین نے کھڑے ہو کر سنا اور اپنے اپنے وطن سے عقیدت و محبت کا اظہار کیا۔ تقریب کے مہمانِ خصوصی گویانگ سٹی کے میئر لی ڈونگ ہوان نے جشن آزادی کی مبارکباد دیتے ہوئے پاک۔

(جاری ہے)

کوریا ثقافتی و اقتصادی تعلقات کو مزید مضبوط کرنے کے عزم کا اظہار کیا۔جنوبی کوریا میں پاکستان کے سفیر سید معظم علی شاہ نے تقریب سے خطاب میں پی بی اے کی خدمات کو سراہا اور کہا کہ کمیونٹی پاکستان کے غیر رسمی سفیر ہیں جو دونوں ممالک کے تعلقات کو بلندیوں تک لے جا سکتے ہیں۔

تقریب میں پیش کئے گئے ملی نغموں اور موسیقی سے شرکاء نے بھرپور لطف اٹھایا۔ پاکستان سے آئے فنکار علی عباس اور مناہل ابرار نے شاندار پرفارمنس کا مظاہرہ کیا جبکہ معروف یوٹیوبر مسٹر الیکس کی نے پاکستان کے سیاحتی مقامات اور اپنے تعلیمی منصوبوں پر ڈاکومنٹری پیش کی جسے حاظرین کی جانب سے خوب پذیرائی حاصل ہوئی۔ پی بی اے قیادت بشمول صدر رحیم شاہ، چیئرمین مدثر چیمہ، جنرل سیکرٹری میاں صغیر احمد اور نائب صدر محمد کاظم نے بھی اپنے خطابات میں کمیونٹی کے اتحاد، پاکستان کی آزادی کی اہمیت اور پاک۔

کوریا تعلقات کے فروغ پر زور دیا۔ اس موقع پر دو طرفہ تجارتی و معاشی تعلقات کے فروغ کیلئے گو یانگ چیمبر آف کامرس اینڈ انڈسٹری اور پاکستان چیمبر آف کامرس اینڈ انڈسٹری کوریا نے باہمی مفاہمت کی 2 یادداشتوں پر بھی دستخط کئے۔ واضح رہے کہ تقریب میں پاکستانی کمیونٹی اور کورین معزز مہمانوں کی بڑی تعداد نے شرکت کی جبکہ منہاج القرآن کے علامہ رضا قادری نے اختتامی دعا کروائی جس کے بعدتقریب جشن آزادی ،معرکہ حق کے تھیم کے تحت کامیابی کے ساتھ اختتام پذیر ہو گئی ۔\932