صوبائی وزیر تعلیم کا گورنمنٹ ہائر سیکنڈری سکول ادینہ صوابی میں شجرکاری مہم کا آغاز

پشاور (اُردو پوائنٹ اخبارتازہ ترین - اے پی پی۔ 18 اگست2025ء) صوبائی وزیر تعلیم فیصل خان ترکئی نے گورنمنٹ ہائر سیکنڈری سکول ادینہ صوابی میں درخت لگا کر مون سون شجرکاری مہم کا آغاز کیا۔ ایک بیٹی ایک درخت کے نام سے شروع کردہ یہ مہم محکمہ تعلیم کی طرف سے صوبہ بھر کے ہر سکول میں جاری رہے گا اور صوبہ بھر میں طلباء و طالبات اور اساتذہ لاکھوں کی تعداد میں درخت اور پودے لگا کر کلین اینڈ گرین خیبر پختونخوا میں حصہ لیں گے۔

منعقدہ تقریب سے خطاب کرتے ہوئے وزیر تعلیم فیصل خان ترکئی نے کہا کہ محکمہ تعلیم اس قسم کے مہمات میں حصہ لے کر ہم اپنے انے والی نسلوں کو کلائمیٹ چینج اور گلوبل وارمنگ سے آگاہ کر رہے ہیںبب اور ان پر قابو پانے کے لئے درخت لگانا ہی واحد حل ہے۔ انہوں نے کہا کہ خیبر پختونخوا اور پورا پاکستان اس وقت کلائمیٹ چینج کی لپیٹ میں ہے اور حالیہ بارشوں اور سیلاب کی وجہ سے قیمتی جانیں ضائع ہو گئی۔

(جاری ہے)

اربوں روپے کا نقصان ہوا، روڈز، سکول، ہسپتال اور عوام کے گھر تباہ ہو گئے جس کی بنیادی وجہ کلائمیٹ چینج ہے اور ہم صرف درخت لگا کر ہی ان پر قابو پا سکتے ہیں ورنہ آنے والے چند سالوں میں موسمیاتی تبدیلی کے ساتھ ساتھ ہمیں اس قسم کے شدید مصیبتوں کا سامنا کرنا ہوگا ہم اپنے طلباء و طالبات کو آگاہ کرنا چاہتے ہیں کہ اس قسم کے نقصانات اور مسائل سے صرف ایک ہی صورت پر قابو پایا جا سکتا ہے اور وہ ہے شجر کاری۔

وزیر تعلیم نے صوبہ بھر کے ڈسٹرکٹ ایجوکیشن آفیسرز، پرنسپلز، ہیڈ ماسٹرز اور تمام طلباء و طالبات کو ہدایت جاری کی کہ اس جاری مہم میں بھرپور حصہ لیں اور ہر بچہ کم از کم ایک پودا لگا کر اپنے حصے کا حق ادا کریں۔ انہوں نے کہا کہ اسلامی تعلیمات کی روشنی میں بھی شجرکاری کی انتہائی اہمیت ہے اور درخت لگانا صدقہ جاریہ کے زمرے میں آتا ہے۔ جس کے ثمرات اگلی نسلوں کو منتقل ہوتی ہیں وزیر تعلیم نے مزید کہا کہ ہم نے کلائمیٹ چینج اور گلوبل وارمنگ کے بارے میں آگاہی پھیلانا ہے کیونکہ ہمارا پورا ملک اس کی لپیٹ میں ہے۔

انہوں نے کہا کہ عمران خان واحد لیڈر تھا جس نے اس کی آگاہی بھی دی اور عملی اقدامات بھی کئے ان کے دور میں بلین ٹری سونامی 10 بلین ٹری سونامی منصوبوں کا اغاز ہوا۔ سابقہ وزیر تعلیم شہرام خان ترکئی نے اپنے دور میں صوبہ بھر کے سکولوں میں کلین اینڈ گرین سکولز پروگرام کا آغاز کیا جس کی بدولت آج صوبہ برگ کے سکول صاف ستھرے اور سرسبز و شاداب ہیں۔

ہم نے اسی طرح امسال کے اس مہم میں بھی لیڈ لینا ہے اور اپنے گھروں اور سکولوں میں درخت لگانے ہیں۔ انہوں نے محکمہ تعلیم کے حکام کو ہدایت کی کہ عوام میں آگاہی پھیلانے کے لیے اقدامات کریں اور سکولوں میں منعقدہ شجرکاری مہم کی بھی بذریعہ سوشل، پرنٹ اور الیکٹرانک میڈیا تشہیر کریں تاکہ عوام میں مزید آگاہی پیدا ہو سکیں۔ انہوں نے محکمہ تعلیم حکام کو ہدایت کی کہ نئے سکولوں کی فیزیبلٹی اور سائیٹ سلیکشن پر خصوصی توجہ دے اور محفوظ مقامات پر سکولوں کی فیزیبلٹی بنائیں تاکہ ان کے متاثر ہونے کا خطرہ نہ ہو۔

انہوں نے کہا کہ محکمہ تعلیم انرولمنٹ ڈرائیو کی طرح ہر سال شجر کاری مہم کے لئے بھی اقدامات کرے گی۔ وزیر تعلیم فیصل خان ترکئی نے مزید کہا کہ ہم نے گلوبل وارمنگ اور کلائمیٹ چینج پر خصوصی توجہ دینی ہے۔ ہمیں بین الاقوامی اداروں کی معاونت لینی چاہیے۔ ہمارے ریسرچرز کو ان پر ریسرچ کرنا چاہیے اور صوبہ بھر کے عوام کو اس کے خطرناک اثرات سے نمٹنے کے لیے اگاہی دینی ہوگی۔