اسرائیل کو خبردار کرتے ہیں غزہ سے آبادی کا انخلا ریڈ لائن ہے، مصر

منگل 19 اگست 2025 16:35

قاہرہ(اُردو پوائنٹ اخبارتازہ ترین - این این آئی۔ 19 اگست2025ء)مصری وزیر خارجہ نے اسرائیل کو خبردار کیا ہے کہ غزہ سے آبادی کا انخلا ہماری ریڈ لائن ہوگا۔غیرملکی میڈیا کے مطابق مصری وزیرِخارجہ بدر عبدالعاطی نے میڈیا سے گفتگو کے دوران کہا کہ مصر کسی کو اپنی قومی سلامتی سے کھیلنے کی اجازت نہیں دے گا۔مصری وزیر خارجہ نے بتایا کہ مصر غزہ میں فلسطینیوں کے مسائل کم کرنے کے لیے مختلف چینلز سے کوششیں کر رہا ہے۔

(جاری ہے)

غزہ سے آبادی کے انخلا کے حوالے سے بات کرت ہوئے مصری وزیرِخارجہ نے بتایا کہ ہم نہ اس کو قبول کریں گے، نہ ہی اس میں حصہ لینا چاہیں گے، بلکہ ہم یہ کہیں گے کہ آبادی کو نکالا جانا فلسطینیوں کے لیے یکطرفہ ٹکٹ ہوگا جس کے بعد ان کا مقصد مکمل طور پر ختم ہوجائے گا۔انہوں نے کہا کہ اسرائیل کی جانب سے اس جنگ کے بعد کے بننے والے منظر کی کوئی تفصیل سامنے نہیں رکھی گئی، لیکن اسرائیلی وزیرِاعظم کے غزہ سے لوگوں کو فلسطین سے دوسرے ممالک منتقل کرنے کے حوالے سے دلائل سامنے آتے رہے ہیں۔