سید یوسف رضا گیلانی سے ایتھوپیا کے سفیر کی ملاقات دو طرفہ تعاون اور عالمی امور پر تبادلہ خیال

اسلا م آباد (اُردو پوائنٹ اخبارتازہ ترین - این این آئی۔ 19 اگست2025ء)چیئرمین سینیٹ سید یوسف رضا گیلانی سے ایتھوپیا کے سفیر ڈاکٹر جمال بکر عبداللہ نے منگل کو یہاں اہم ملاقات کی جس میں دو طرفہ تعلقات، تجارت، سرمایہ کاری، ماحولیاتی تعاون سمیت علاقائی و عالمی امور پر تفصیلی تبادلہ خیال کیا گیا۔اس موقع پر چیئرمین سینیٹ، سینیٹرز اور ایتھوپیا کے سفیر نے پارلیمنٹ ہاؤس کے فرینڈشپ گارڈن میں شجرکاری مہم کے سلسلے میں ایک پودا بھی لگایا۔

سینیٹ سیکرٹریٹ کے مطابق چیئرمین سینیٹ نے اس امر پر زور دیا کہ پاکستان اور ایتھوپیا کے درمیان دیرینہ اور تاریخی تعلقات ہیں۔ انہوں نے اسلام آباد میں ایتھوپیا کے سفارتخانے کے قیام اور کراچی سے ادیس ابابا تک ایتھوپین ایئرلائنز کی براہ راست پروازوں کے آغاز کو دو طرفہ تعلقات کو مضبوط بنانے میں اہم سنگ میل قرار دیا۔

(جاری ہے)

انہوں نے ایئر سروسز معاہدے کی جلد تکمیل پر بھی زور دیا تاکہ تجارت اور سرمایہ کاری کے نئے مواقع کھل سکیں۔

سید یوسف رضا گیلانی نے پاکستان کی جانب سے اقوام متحدہ کی سلامتی کونسل (2025-26) کی غیر مستقل رکنیت کے لئے حمایت پر ایتھوپیا کا شکریہ ادا کیا اور کہا کہ علاقائی اور عالمی سطح پر دونوں ممالک کے درمیان قریبی تعاون نے ہمیشہ باہمی تعلقات کو مزید مستحکم کیا ہے،پارلیمانی سفارتکاری کے کردار کو اجاگر کرتے ہوئے چیئرمین سینیٹ نے پاکستانطایتھوپیا پارلیمانی فرینڈشپ گروپ کی سرگرمیوں کا ذکر کیا اور پارلیمانی وفود اور عوامی روابط کے مزید فروغ پر زور دیا۔

انہوں نے اس بات کا اعادہ کیا کہ اقتصادی سفارتکاری پاکستان کی خارجہ پالیسی کا بنیادی ستون ہے اور دو طرفہ تجارت میں تنوع پیدا کرنے کے لئے مزید کوششوں کی ضرورت ہے۔چیئرمین سینیٹ نے کہا کہ پاکستان کی عالمی سطح پر شہرت یافتہ مصنوعات بشمول اعلیٰ معیار کا چاول، سرجیکل اور میڈیکل آلات، دواسازی کی اشیاء اور فیفا معیار کے فٹ بالز وہ شعبے ہیں جہاں ایتھوپیا درآمدات بڑھا سکتا ہے، اس کے ساتھ ساتھ انفارمیشن ٹیکنالوجی، سائنس، تعلیم اور ووکیشنل ٹریننگ کے میدانوں میں بھی تعاون کے روشن امکانات موجود ہیں۔

ماحولیاتی تبدیلی کے حوالے سیسید یوسف رضا گیلانی نے ایتھوپیا کے گرین ڈائیلاگ پروگرام کو سراہا اور پائیدار اور ماحول دوست مستقبل کے لئے مشترکہ اقدامات کی ضرورت پر زور دیا۔ملاقات کے اختتام پر چیئرمین سینیٹ نے ایتھوپیا کی پارلیمانی قیادت کو انٹًرپارلیمنٹری اسپیکرز کانفرنس میں شرکت کی دعوت دی جو رواں سال نومبر میں منعقد ہونے والی ہے۔

انہوں نے کہا کہ بطور بانی چیئرمین ا?ئی ایس سی وہ دعوت دیتے ہیں کہ ایتھوپیا کانفرنس میں شریک ہوں اور مشترکہ حکمت عملی کے ذریعے درپیش چیلنجز کا سامنا کیا جا سکے۔اس موقع پر چیئرمین سینیٹ کے ہمراہ سینیٹر شیری رحمان، سینیٹر عرفان الحق صدیقی، سید علی ظفر اور چیئرمین سینیٹ کی مشیر مصباح کھر بھی موجود تھیں۔ایتھوپیا کے سفیر ڈاکٹر جمال بکر عبداللہ نے چیئرمین سینیٹ کے مؤقف کی تائید کی اور بین الاقوامی سطح پر پاکستان کے تعلقات کو فروغ دینے کی ان کی کاوشوں کو سراہا۔ انہوں نے ایتھوپیا کے بھرپور تعاون کی یقین دہانی کراتے ہوئے کہا کہ دونوں ممالک کے درمیان مشترکات ایسے ہیں جو دوستانہ تعلقات کو مزید مضبوط بنا سکتے ہیں۔