فوڈ انڈسٹری میں بہتری کیلئے پنجاب فوڈ اتھارٹی و18ویں فوڈ ایشیاء انٹرنیشنل ایکسپوبارے معاہدہ طے

بدھ 20 اگست 2025 21:00

لاہور (اُردو پوائنٹ اخبارتازہ ترین - اے پی پی۔ 20 اگست2025ء) پنجاب فوڈ اتھارٹی اور 18ویں فوڈ ایشیاء انٹرنیشنل ایکسپو کے حوالے سے ایم او یو سائن کر لیا گیا، فوڈ ایشیاء ایکسپو میں چین، ترکی اور ایران کی فوڈ انڈسٹری بھی حصہ لے گی۔ترجمان کے مطابق ڈی جی فوڈ اتھارٹی عاصم جاوید کے فوڈ گریڈ پیکجنگ، نیوٹریشن آگاہی، ایکسپورٹ میں اضافے کے لیے اقدامات بھی جاری ہیں، حلال میٹ کی ایکسپورٹ، ڈیری اشیاء کے معیار میں بہتری کے حوالے سے کانفرنس بھی ہوں گی۔

ڈی جی فوڈاتھارٹی کاکہناہے کہ نیوٹریشن، معیاری خوراک، فوڈ بزنس فیسیلیٹیشن اور فوڈ سیفٹی آگاہی کے حوالے سے سٹالز بھی لگائے جائیں گے،معاہدے کا مقصد فوڈ سیفٹی کے عالمی معیار کو صوبائی دارالحکومت لاہور میں متعارف کروانا ہے۔

(جاری ہے)

انہوں نے کہاکہ پاکستان کی فوڈ انڈسٹری کو عالمی مارکیٹ سے جوڑنے کے لیے ایکسپو کا انعقاد کیا جا رہا ہے جس میں600 سے زائد ملکی و غیر ملکی کمپنیاں اپنی مصنوعات پیش کریں گی جبکہ1000 سے زیادہ برانڈز جدید پراسیسنگ اور پیکجنگ میں جدت سے مستفید ہوں گے۔

ڈی جی فوڈاتھارٹی نے بتایا کہ پروگرام میں 10 ممالک سے100 بین الاقوامی مہمان لاہور میں شرکت کریں گے،پاکستان کی سالانہ فوڈ ایکسپورٹس 5 ارب ڈالر سے تجاوز کر گئی اور پنجاب کا زرعی برآمدات میں 60 فیصد سے زائد حصہ ہے،معاہدے سے نئی ایکسپورٹ راہیں اور سرمایہ کاری کے مواقع کھلیں گے۔ ڈی جی فوڈاتھارٹی کا کہنا تھا کہ عالمی سرٹیفیکیشنز کے مطابق معیار اپ گریڈ اور لاہور کو عالمی فوڈ انڈسٹری کا مرکز بنایا جائے گا،وزیر اعلی پنجاب کے ویژن کے مطابق صحت مند پنجاب کے عزم کی تکمیل کیلئے کوشاں ہیں۔