ٓلاہور سمیت صوبہ بھر میں پنجاب پولیس جرائم پیشہ و ملک دشمن عناصر کی سرکوبی کیلئے سرگرم عمل

ؒپنجاب پولیس کی قتل، اغوا برائے تاوان، زیادتی، ڈکیتی سمیت دیگر سنگین جرائم میں ملوث گینگز کے خلاف کاروائیاں، ترجمان

جمعرات 21 اگست 2025 19:45

لاہور (اُردو پوائنٹ اخبارتازہ ترین - آن لائن۔ 21 اگست2025ء) وزیر اعلیٰ پنجاب مریم نواز شریف کے محفوظ پنجاب ویژن کی تکمیل میںلاہور سمیت صوبہ بھر میں پنجاب پولیس جرائم پیشہ و ملک دشمن عناصر کی سرکوبی کیلئے سرگرم عمل ہے۔ ترجمان پنجاب پولیس نے تفصیلات سے آگاہ کرتے ہوئے بتایا کہ پنجاب پولیس کی قتل، اغوا برائے تاوان، زیادتی اور ڈکیتی سمیت دیگر سنگین جرائم میں ملوث گینگز کے خلاف کاروائیاں بلا تعطل جاری ہیں۔

رواں سال کے دوران پنجاب پولیس نے 3878 گینگز کے 9 ہزار 688 خطرناک مجرمان کو گرفتار کر کے ان کے قبضہ سے 2 ارب 35 کروڑ روپے سے زائد مالیت کا مال مسروقہ برآمد کیا۔ مال مسروقہ میں گاڑیاں، موٹر سائیکلیں، موبائل فونز، سونا، مویشی اور نقدی شامل ہیں۔ مجرمان کے قبضہ سے 1261 کلاشنکوف، 2191 رائفلز، 26338 پسٹلز،2331 بندوقیں، 353 ریوالور اور 1 لاکھ 92 ہزار سے زائد گولیاں بھی برآمد کی گئیں۔

(جاری ہے)

صوبائی دارالحکومت لاہور میں 1911 گینگز کے 4353 مجرمان گرفتار کیے گئے۔آئی جی پنجاب ڈاکٹر عثمان انورنے افسران کو جرائم پیشہ افراد کے خلاف آپریشنز جاری رکھنے کی ہدایت کی۔ انھوں نے کہا کہ وزیر اعلیٰ پنجاب مریم نواز شریف کے ویژن کے تحت پنجاب کو کرائم فری صوبہ بنانے کیلئے خطرناک مجرمان کیخلاف کاروائیاں جاری رکھی جائیں۔