استحکام پاکستان پارٹی کا کا ملک کے چاروں صوبوں کو تقسیم کرکے نئے صوبوں کے قیام کا مطالبہ

جمعہ 22 اگست 2025 17:48

لاہور(اُردو پوائنٹ اخبارتازہ ترین - این این آئی۔ 22 اگست2025ء)استحکام پاکستان پارٹی نے ملک کے چاروں صوبوں کو تقسیم کرکے نئے صوبوں کے قیام کا مطالبہ کردیا۔صدر استحکام پاکستان پارٹی عبدالعلیم خان کی زیرصدارت اجلاس میں نئے صوبوں کے قیام کی سفارشات پیش کی گئی، اجلاس میں عون چوہدری، صدر آئی پی پی پنجاب رانا نذیراحمد اور دیگر عہدیداروں نے شرکت کیں۔

اعلامیے کے مطابق چاروں صوبوں کو3،3نئے صوبوں میں تقسیم کیا جائے۔ آئی پی پی کی سینٹرل کمیٹی پہلے ہی نئے صوبوں کے قیام کی قرارداد پیش کرچکی۔اجلاس میں اظہار خیال کرتے ہوئے صدر استحکام پاکستان پارٹی عبدالعلیم خان نے کہا کہ آبادی میں اضافے کے بعد نئے صوبوں کا قیام ناگزیر ہوچکاہے، پنجاب، سندھ، خیبرپختونخوا ہ اور بلوچستان میں نئے صوبے بننے چاہئیں۔

(جاری ہے)

ہر صوبے میں اسی نام کے ساتھ نارتھ، ساتھ، سینٹرل نئے صوبے بنانے ہوں گے۔عبدالعلیم خان نے کہا کہ نئے صوبے ملکی استحکام اورمعیشت کی بہتری میں معاون ثابت ہوں گے، وقت آگیا ہے کہ باہمی مشاورت سے نئے صوبوں کے قیام کی راہ ہموار ہو۔ انہوں نے کہا کہ نئے صوبوں پر صرف سیاست ہوئی، زبانی جمع خرچ کے سوا کچھ نہیں ہوا، گزشتہ 25سال سے صوبوں کی تقسیم کی بات چل رہی ہے، موجودہ صوبوں کواسی شناخت کے ساتھ 3حصوں میں تقسیم کیا جاسکتاہے۔

صدر استحکام پاکستان پارٹی عبد العلیم خان نے کہا کہ سیکرٹریٹ میں میلوں دور سے آنے والے شہریوں کو ریلیف ملے گا، عوام کی شکایات کے ازالے کیلئے نئے صوبے جلد بنائے جائیں۔ نئے صوبوں میں ہائیکورٹ، چیف سیکرٹری اور آئی جی بہترکام کرسکیں گے، نئے صوبوں سے عوام کے مسائل کا حل انکی دہلیز پر ممکن ہوگا۔