وزیرہائوسنگ بلال یاسین کی زیر صدارت اجلاس،پنجاب کے13اضلاع میں نئے واساز کی فعالیت کے امور پر غور کیا گیا

جمعہ 22 اگست 2025 20:15

لاہور (اُردو پوائنٹ اخبارتازہ ترین - اے پی پی۔ 22 اگست2025ء) وزیر ہائوسنگ اینڈ اربن ڈویلپمنٹ بلال یاسین کی زیر صدارت واسا لاہور میں ایک اہم اجلاس منعقد ہوا ،جس میں صوبے کے13 اضلاع میں نئے واساز کی فعالیت کے امور پر غور کیا گیا۔ترجمان کے مطابق اجلاس میں ڈی جی واسا پنجاب طیب فرید نے ادارے کو درپیش مسائل اور دستیاب وسائل بارے تفصیلی بریفنگ دی۔

اجلاس کو بتایا گیا کہ تمام اضلاع کے میٹروپولیٹن کارپوریشنز کی فعال مشینری اور سٹاف کو واساز کے ڈسپوزل پر منتقل کر دیا گیا ہے تاکہ کارکردگی میں مزید بہتری لائی جا سکے۔اس موقع پر مرکزی دفاتر، سنٹرل کمپلینٹ مینجمنٹ، بورڈ آف مینجمنٹ کی تشکیل اور دیگر اہم معاملات پر بھی گفتگو کی گئی۔وزیر ہائوسنگ پنجاب نے ہدایت کی کہ موجودہ حالات کے پیش نظر تمام واساز ڈی سلٹنگ مہم کو تیزی سے جاری رکھیں، وزیر اعلی پنجاب کی ہدایات کے مطابق ترجیحی بنیادوں پر وسائل کی فراہمی یقینی بنائی جائے گی۔

(جاری ہے)

ان کا کہنا تھا کہ عوامی مشکلات کا بروقت تدارک افسران کی اولین ذمہ داری جبکہ نئے واساز کے قیام اور فعالیت بارے عوامی آگاہی مہم بھی وقت کی اہم ضرورت ہے۔اجلاس میں ایم ڈی واسا لاہور، سرگودھا، جھنگ، ساہیوال، اوکاڑہ اور سیالکوٹ کے ایم ڈیز شریک تھے جبکہ حافظ آباد، جہلم، رحیم یار خان، ڈیرہ غازی خان اور بہاولپور کے ایم ڈیز نے ویڈیو لنک کے ذریعے اجلاس میں شرکت کی۔