عسکری و حکومتی قیادت کی بہترین حکمت عملی اور قومی یکجہتی سے سچ کی بنیاد پر معرکہ حق میں تاریخی فتح ملی ، عطاء اللہ تارڑ

اسلام آباد (اُردو پوائنٹ اخبارتازہ ترین - آن لائن۔ 22 اگست2025ء) وزیر اطلاعات عطاء اللہ تارڑ نے کہا ہے کہ عسکری و حکومتی قیادت کی بہترین حکمت عملی اور قومی یکجہتی سے سچ کی بنیاد پر معرکہ حق میں تاریخی فتح ملی ۔ جنگ میں کا میابی سے دنیا بھر میں سبز پاسپورٹ کے وقار میں اضافہ ہو ا۔ جنگ میں میڈیا نے بھی اپنا بھرپور اور قابل ستائش کردار ادا کیا ۔

بھارت کے خطے میں طاقت کا گھمنڈ خاک میں مل گیا ۔ سی پی این ای کے زیر اہتمام تقریب سے خطاب کرتے ہوے انہوں نے کہا اللہ تعالیٰ کے خاص فضل و کرم سے پاکستان نے بھارت کے خلاف حالیہ جنگ کامیابی سے لڑی۔ دنیا بھر میں پاکستان کے حوالے سے شکوک و شبہات تھے، بعض لوگ پاکستان کو رائٹ آف کر رہے تھے۔ تاہم اس جنگ نے سبز پاسپورٹ کی عزت اور وقار میں اضافہ کیا۔

(جاری ہے)

دنیا نے دیکھا کہ پوری قوم متحد ہو کر کھڑی ہے۔ انہوں نے کہا ہائوس کے فلور پر میں نے بطور وزیر اطلاعات یہ کہا کہ یہ وقت ہے کہ ہم متحد ہو کر قومی سطح پر یہ جنگ لڑیں، اللہ تعالیٰ کا شکر ہے کہ ہم نے اپنی زندگی میں یہ منظر دیکھا کہ پاکستان نے فتح حاصل کی، ہم سب کو اس میں حصہ ڈالنے کی توفیق ملی۔ سب سے پہلے بیانیہ کی جنگ شروع ہوئی۔ دشمن کے پاس وسائل، افرادی قوت اور انٹرنیشنل لابنگ زیادہ تھی لیکن ہمارے پاس سچ کی طاقت تھی۔

اور اس سچ نے دشمن کو چاروں شانے چت کیا۔ انہوں نے کہا کہ وزیراعظم نے کاکول میں خطاب کے دوران پہلگام واقعہ کی تحقیقات کی پیشکش کی۔ ہمارے موقف کو عالمی سطح پر تقویت ملی۔ انہوں نے کہا وزارت اطلاعات نے جدید ڈیجیٹل وار روم قائم کیا جو بیانیہ کی جنگ میں فیصلہ کن ثابت ہوا۔ آئی ایس پی آر سے لمحہ بہ لمحہ رابطہ رہا اور عالمی میڈیا میں پلیسمنٹ کے حوالے سے مشترکہ حکمت عملی اپنائی گئی، یہ جنگ افواج پاکستان، وزارت اطلاعات اور میڈیا نے مل کر لڑی۔

انہوں نے کہا دشمن کا میڈیا جھوٹا پروپیگنڈا کرتا رہا جبکہ پاکستانی میڈیا نے ریاست کے بیانیہ کو عالمی سطح پر اجاگر کیا ۔ ملک کے دفاع اور سالمیت کے لئے موثر کردار ادا کیا، یہی وجہ ہے کہ آج دنیا میں پاکستانی عوام کی عزت اور وقار میں اضافہ ہوا ہے۔ عسکری قیادت نے نیشنل سیکورٹی کونسل کے فیصلوں پر عمل درآمد کرتے ہوئے دشمن کو ناکام بنایا۔

ایئر فورس کے شاہینوں نے تاریخ ساز کارنامہ انجام دیا۔ نیوی کے جوان ہر لمحہ دفاع وطن کے لئے تیار تھے کہ آپریشن دوارکا کی تاریخ دوہرانا پڑی تو دوہرائیں گے۔ وفاقی وزیر نے جنگ کے دوران بھارتی میڈیا کے مضحکہ خیز پروپیگنڈے پر بات کرتے ہوے کہا دشمن کو جب لگا کہ یہ کراچی پورٹ تباہ نہیں کر سکے تو اس نے لاہور اور ملتان کی خیالی پورٹس کو تباہ کرنے کا جھوٹا پروپیگنڈا کیا۔

انہوں نے کہا پاکستانی قوم نے رات کے اندھیرے میں ہونے والے حملے کا فجر کے وقت بھرپور جواب دیا۔ پوری قوم سیسہ پلائی دیوار بن کر کھڑی رہی۔ اللہ تعالیٰ نے جنگ سے پہلے، جنگ کے دوران اور بعد میں پاکستان کو عزت و وقار سے نوازا۔ انہوں نے کہا یوٹیوب چینلز کی بندش کے بعد انڈیا میں پاکستانی اشتہارات کے چلنے کی حکمت عملی نے دشمن کو سخت مشکل میں ڈالا۔ انہوں نے کہا میڈیا کا اس جنگ میں کردار قابل ستائش ہے ۔ جنگ میں کامیابی میں میڈیا نے بھرپور حصہ ڈالا ہے ۔ انہوں نے کہا وزارت اطلاعات اور اس کے دروازے سی پی این ای کے لئے چوبیس گھنٹے کھلے ہیں۔ انہوں نے کہا کہ بھار ت کا خطے کی طاقت ہونے کا گھمنڈ خاک میں مل گیا ۔ پاکستان دنیا کے نقشے پر نئے انداز سے ابھرا ہے ۔