خیبرپختونخوا میں پاک فوج کا فلڈ ریلیف آپریشن ساتویں روزبھی جاری

پاک فوج کی میڈیکل ٹیمیں متاثرہ علاقوں میں فری میڈیکل کیمپس لگا کر مریضوں کو علاج معالجہ فراہم کر رہی ہیں

جمعہ 22 اگست 2025 20:49

اسلام آباد(اُردو پوائنٹ اخبارتازہ ترین - آن لائن۔ 22 اگست2025ء) خیبر پختونخوا کے مختلف اضلاع بونیر، سوات، شانگلہ اور صوابی میں پاک فوج کا فلڈ ریلیف آپریشن ساتویں روز بھی بھرپور انداز میں جاری ہے۔ترجمان پاک فوج کے مطابق کور آف انجینئرز کے دستے متاثرہ علاقوں میں بند راستوں کو کھولنے اور ملبے کو ہٹانے میں مصروف ہیں تاکہ آمدورفت بحال ہو سکے۔

(جاری ہے)

اس کے ساتھ ساتھ فوجی ہیلی کاپٹرز کے ذریعے سیلاب متاثرین تک راشن اور ضروری سامان پہنچایا جا رہا ہے۔سیلاب سے متاثرہ آبادی کو محفوظ مقامات پر منتقل کرنے کا عمل بھی جاری ہے، جبکہ کور آف انجینئرز کی اربن سرچ اینڈ ریسکیو ٹیم (USAR) ملبے سے زخمیوں اور جاں بحق افراد کو نکالنے میں مصروف ہے۔پاک فوج کی میڈیکل ٹیمیں متاثرہ علاقوں میں فری میڈیکل کیمپس لگا کر مریضوں کو علاج معالجہ فراہم کر رہی ہیں۔ترجمان کے مطابق متاثرہ عوام کی مکمل بحالی اور ریسکیو آپریشن کی تکمیل تک پاک فوج کا ریلیف مشن بلا تعطل جاری رہے گا