پی ایچ اے وایتھوپیا سفارتخانے کے اشتراک سے ’’ایتھوپاکستان گرین ڈائیلاگ‘‘ تقریب کا انعقاد

لاہور (اُردو پوائنٹ اخبارتازہ ترین - اے پی پی۔ 22 اگست2025ء) پارکسں اینڈ ہارٹیکلچر اتھارٹی لاہور اور ایتھوپیا کے سفارتخانے اسلام آباد کے اشتراک سے لاہور کے مقامی ہوٹل میں ’’ایتھوپاکستان گرین ڈائیلاگ‘‘ ایتھوپیا کی گرین لیگیسی انیشی ایٹو کے عنوان سے تقریب کا انعقاد کیا گیا۔ترجمان کے مطابق تقریب کے مہمان خصوصی صوبائی وزیر ہائوسنگ بلال یاسین تھے جبکہ سیکرٹری جنگلات مدثر ریاض ملک، ڈی جی پی ایچ اے پنجاب ناہید گل اور ایف پی سی سی آئی کے نائب صدر ذکی اعجاز نے بطور اعزازی مہمان شرکت کی۔

اس موقع پر ماحول دوست کلچر، جدید ٹیکنالوجی اور جدت کے ذریعے موسمیاتی تبدیلیوں سے نمٹنے کے اقدامات پر تبادلہ خیال کیا گیا ۔ایتھوپیا کے اعلی سطحی وفد کے علاوہ پاکستان سے سرکاری افسران، سفارتی نمائندے، ماہرین ماحولیات، مذہبی رہنما، تاجر برادری، یونیورسٹی پروفیسرز، طلبا وطالبات اور سول سوسائٹی کی بڑی تعداد نے شرکت کی۔

(جاری ہے)

وفاقی جمہوریہ ایتھوپیا کے خصوصی ایلچی و سفیر ڈاکٹر جمال بکر عبداللہ اور ڈائریکٹر جنرل پی ایچ اے لاہور منصور احمد نے ڈائیلاگ کی صدارت کی۔

ترجمان کے مطابق ایتھوپین سفیر نے شرکاء کو وزیراعظم ایتھوپیا ڈاکٹر ابی احمد کے ’’گرین لیگیسی انیشی ایٹو‘‘ سے آگاہ کیا جس کے تحت 41 ارب سے زائد پودے بذریعہ بیج لگائے گئے، جس سے جنگلات میں اضافہ،خوراک کے مسائل میں کمی، مٹی کے کٹائو پر قابو، غربت اور بے روزگاری میں کمی لانے میں مدد ملی۔ ڈاکٹر جمال بکر عبداللہ نے کہا کہ پاکستان کاربن کے اخراج میں کم ترین حصہ ڈالنے کے باوجود موسمیاتی تبدیلیوں سے شدید متاثر ہے، پاکستان اس جدوجہد میں تنہا نہیں، ایتھوپیا اپنے پاکستانی بھائیوں کے ساتھ کھڑا ہے۔

انہوں نے وزیراعلی پنجاب مریم نواز کا شکریہ ادا کیا جنہوں نے پنجاب میں گرین لیگیسی پروگرام پر گفتگو کا موقع فراہم کیا۔ ڈی جی پی ایچ اے منصور احمد نے کہا کہ یہ ڈائیلاگ وزیراعلی پنجاب کے ماحول دوست ویژن کی عکاسی ہے، جو صوبے کو پائیدار اور جدید خطوط پر استوار کرنے کے لیے پرعزم ہیں۔ نائب صدر ایف پی سی سی آئی ذکی اعجاز نے موسمیاتی تبدیلی جیسے بڑے چیلنج پر ایتھوپین سفارتخانے اور پنجاب حکومت کی کاوشوں کو سراہا۔

تقریب کے دوران گرین لیگیسی ایوارڈز دیے گئے اور شرکاء کی جانب سے شجرکاری بھی کی گئی، جس سے پاکستان اور ایتھوپیا کے ماحول دوست تعاون کے عزم کو اجاگر کیا گیا۔ اختتامی سیشن میں گرین لیگیسی انیشی ایٹو پر ماہرین اور پالیسی سازوں کی پینل ڈسکشن ہوئی جس میں دیرپا ماحولیاتی استحکام کے لیے حکمت عملی اور کمیونٹی ماڈلز پیش کیے گئے۔ بعد ازاں سوال و جواب کے سیشن میں شرکاء نے پاکستان ایتھوپیا تعاون کے مزید فروغ پر بھرپور حمایت کا اظہار کیا۔