گلگت ،غذر میں گلوف کے باعث سیلابی صورتحال ،وزیراعظم نے خصوصی احکامات جاری کردیئے

نظر این ڈے ایم اے کو تمام صوبائی ڈیزاسٹر مینجمنٹ اتھارٹیوں سے رابطہ قائم رکھنے کی ہدایت

ہفتہ 23 اگست 2025 20:50

گلگت (اُردو پوائنٹ اخبارتازہ ترین - این این آئی۔ 23 اگست2025ء)وزیراعظم شہباز شریف نے گلگت بلتستان کے علاقے غذر میں گلوف کے باعث سیلابی صورتحال بننے پر خصوصی احکامات جاری کردیئے۔ جاری بیان کے مطابق وزیراعظم نے این ڈی ایم اے اور ضلعی انتظامیہ کو غذر کے متاثرہ علاقوں میں ریسکیو آپریشن جاری رکھنے کی ہدایت کی۔ وزیراعظم نے آنیوالے دو اسپلز کے حوالے سے متاثرہ علاقوں میں امدادی سرگرمیاں تیز کرنے کی ہدایت تاکہ متاثرین کو اگلے اسپیل سے پہلے محفوظ مقامات پر پہنچایا جاسکے۔

وزیراعظم کی تمام متعلقہ حکام کو آنے والے دنوں میں سیلابی صورتحال کے پیش نظر ملک کے زیریں علاقوں میں امدادی کاروائیوں کی مکمل تیاریاں رکھنے کا حکم دیتے ہوئے کہا کہ دریاؤں، ندی نالوں اور پانی کی قدرتی گزرگاہوں کے گرد تعمیرات کو روکنے کیلئے قومی سطح پر مہم چلائیں گے۔

(جاری ہے)

انہوں نے کہا کہ حالیہ بارشوں و وسیلاب سے متاثرہ لوگوں کی مدد قومی فریضہ ہے، متاثرین کے ریسکیو و امداد کے بعد انکی بحالی کا کام شروع کیا جائے گا۔

انہوں نے کہا کہ تمام متاثرین تک طبی امداد اور امدادی سامان کی فراہمی کو ہر حال میں یقینی بنایا جائے۔وزیراعظم نے دریائے سندھ اور ستلج میں گڈو، سکھر، جی ایس والا اور دیگر مقامات پر سیلابی صورتحال کے پیش نظر این ڈے ایم اے کو تمام صوبائی ڈیزاسٹر مینجمنٹ اتھارٹیوں سے رابطہ قائم رکھنے کی ہدایت کی جبکہ گلوف کی قبل از وقت اطلاع دینے پر غذر کے رہائشی کو خراج تحسین کرتے ہوئے کہا کہ وصیت خان نے اپنی جان جوکھوں میں ڈال کر قبل از وقت مطلع کر کے بڑے جانی نقصان سے بچایا۔