سائنس و ٹیکنالوجی میں پیشرفت کا جائزہ لینے کیلئے ’سرن‘ وفد کا دورہ پاکستان،جدید تحقیقی اداروں کا جائزہ لیا

جمعہ 29 اگست 2025 16:55

اسلام آباد (اُردو پوائنٹ اخبارتازہ ترین - این این آئی۔ 29 اگست2025ء)پاکستان کی سائنس و ٹیکنالوجی کے شعبے میں پیش رفت کا جائزہ لینے کیلئے یورپی ادارہ برائے جوہری تحقیق سرن کے اعلیٰ سطح کے وفد نے پاکستان کا دورہ کیا۔ترجمان دفتر خارجہ کے مطابق 24 تا 28 اگست وفد نے پاکستان کے مختلف سائنسی و تحقیقی اداروں کا دورہ کیا جن میں نیشنل سینٹر فار فزکس، ہیوی مکینیکل کمپلیکس 3 اور پی آئی ای اے ایس شامل ہیں۔

یورپی ادارہ برائے جوہری تحقیق کے وفد نے جدید تحقیقی اداروں کا جائزہ لیا۔

(جاری ہے)

ترجمان دفتر خارجہ نے بتایا کہ دورے کا مقصد پاکستان کی سائنس و ٹیکنالوجی کے شعبے میں پیش رفت کا جائزہ لینا تھا۔ سرن کے پانچ رکنی وفد نے چیئرمین پاکستان اٹامک انرجی کمیشن سے ملاقات کی۔ انہوں نے کہا کہ سرن دنیا کا سب سے بڑا پارٹیکل فزکس اور نیوکلئیر ریسرچ کا عالمی ادارہ ہے، سرن 25 ممبر ممالک اور 9 ایسوسی ایٹ ممبران پر مشتمل ہے، پاکستان 31 جولائی 2015 کو سرن کا ایسوسی ایٹ ممبر بنا تھا۔پاکستان سرن کے مختلف منصوبوں میں سرگرم کردار ادا کر رہا ہے، ایٹمی توانائی کمیشن پاک سرن تعاون کیلیے مرکزی ادارے کے طور پر کام کر رہا ہے۔