بھارت،سسرالیوں نے جہیز کا مطالبہ پورا نہ ہونے پر دلہن کو تیزاب پلا کر مار ڈالا

امروہہ کی پولیس نے متاثرہ کے والد کی شکایت پر شوہر سمیت سات افراد کیخلاف مقدمہ درج کر لیا

جمعہ 29 اگست 2025 16:55

نئی دہلی(اُردو پوائنٹ اخبارتازہ ترین - این این آئی۔ 29 اگست2025ء)بھارت میں سسرالیوں نے جہیز کا مطالبہ پورا نہ ہونے پر دلہن کو تیزاب پلا کر مار ڈالا۔تفصیلات کے مطابق بھارت سے یکے بعد دیگرے جہیز کے بھاری بھرکم مطالبات پورے نہ ہونے پر بہوں کو جان سے مار دینے کی خبریں سامنے آ رہی ہیں۔بھارت میں جہیز کے لالچ میں بہو کی جان لینے کا ایک اور دل دہلا دینے والا واقعہ پیش آیا ہے جہاں سسرالیوں نے 23سالہ دلہن کو مبینہ طور پر زبردستی تیزاب پلا کر موت کے گھاٹ اتار دیا۔

بھارتی میڈیا کے مطابق یہ افسوس ناک واقعہ امروہہ ضلع کے کلاکھیڑا گاؤں میں پیش آیا جہاں نئی نویلی دلہن کو مانگ کے مطابق جہیز نہ لانے پر اس کے سسرالیوں نے زبردستی تیزاب پلا دیا۔بھارتی میڈیا کے مطابق متاثرہ لڑکی کی شادی کچھ روز قبل ہی ہوئی تھی، متوفیہ کے والد نے الزام لگایا ہے کہ شادی ہوتے ہی بیٹی کے سسرالیوں کی جانب سے 10لاکھ روپے نقد اور ایک کار کا مطالبہ کیا جا رہا تھا، جب بیٹی کے سسرالیوں کی مانگ پوری نہیں کی گئی تو اسے مبینہ طور پر تیزاب پلایا گیا جس کے بعد اسے تشویشناک حالت میں اسپتال داخل کروا دیا گیا۔

(جاری ہے)

مقتول لڑکی کے والد نے بتایا کہ میری بیٹی 17دن تک زندگی اور موت کی جنگ لڑتی رہی اور آخر وہ دم توڑ گئی۔امروہہ کی پولیس نے متاثرہ کے والد کی شکایت پر شوہر سمیت سات افراد کے خلاف مقدمہ درج کر لیا ہے۔پولیس کے مطابق جب پوسٹ مارٹم رپورٹ موصول ہوگی تو جہیز کے مطالبے پر قتل کی دفعات شامل کی جائیں گی اور تمام ملزمان کو گرفتار کیا جائے گا۔