وزیراعلیٰ پنجاب مریم نواز شریف کا سیالکوٹ کے سیلاب زدہ علاقوں کا دورہ

سیالكوٹ (اُردو پوائنٹ اخبارتازہ ترین - اے پی پی۔ 29 اگست2025ء) وزیراعلیٰ پنجاب مریم نواز شریف نے سیالکوٹ میں سیلاب زدہ علاقوں کا دورہ کیا ہے۔وزیراعلیٰ نے سیالکوٹ میں سیلابی پانی سے پیدا ہونے والی صورتحال کا جائزہ لیا،ڈپٹی کمشنر ، ضلعی انتظامیہ ،ریسکیو 1122، پولیس کی متاثرین کو ریسکیو کرنے کی سب روز کاوشوں کو سراہا اور انہوں نے کہا کہ مشکل کے وقت میں ارکان اسمبلی کو ہر وقت اپنے عوام کے پاس ہونا چاہیے۔

مریم نواز شریف و ارکان اسمبلی نے بارش کے پانی کی نکاسی کے لئے پائیدار اقدامات کے لئے تجاویز اور سفارشات پیش کیں ،انہوں نے سیلاب سے ہونے والے نقصان کا جلد از جلد تخمینہ پیش کرنے کی ہدایت کی تفصیلات کے مطابق وزیراعلیٰ پنجاب مریم نواز شریف سیالکوٹ سمبڑیال ائیر پورٹ چوک پہنچ گئیں،وزیراعلیٰ نے علاقے میں سیلابی پانی سے پیدا ہونے والی صورتحال کا جائزہ لیا،ڈپٹی کمشنرسیالکوٹ اصغر علی نے سیالکوٹ شہر میں سیلاب اور اس کے بعد پیدا ہونے والی صورتحال پر تفصیلی بریفنگ دی،وزیراعلیٰ نے ڈپٹی کمشنراور ان کی ٹیم کی کاوشوں کو سراہا،انہوں نے متاثرین کو ریسکیو کرنے کے لئے سیالکوٹ انتظامیہ کی شب وروز کاوشوں کوبھی سراہا۔

(جاری ہے)

انہوں نے نشیبی علاقوں سے پانی نکالنے کے لئے مزید ڈی واٹرنگ پمپ سے نکاسی مکمل کرنے اور سیلاب متاثرین کے لئے مکمل بحالی تک کھانے فراہم کرنے اور ارکان اسمبلی کو عوام کے درمیان جانے کی ہدایت کی ہے۔اس موقع پر ارکان اسمبلی نے بارش کے پانی کی نکاسی کے لئے پائیدار اقدامات کے لئے تجاویز اور سفارشات پیش کیں ، وزیراعلیٰ مریم نواز شریف نے سیلاب سے ہونے والے نقصان کا جلد از جلد تخمینہ پیش کرنے کی ہدایت بھی کی۔

وزیراعلیٰ نے کہا کہ مشکل کے وقت میں ارکان اسمبلی کو ہر وقت اپنے عوام کے پاس ہونا چاہیے۔ دورہ کے دوران وزیراعلیٰ کو بریفنگ میں بتایا گیا کہ سیالکوٹ میں حالیہ بارشوں کے دوران تقریبا20 ہزار افراد کو محفوظ مقام پر منتقل کیا گیا، انتظامیہ کی کاوشوں سے سیلاب میں پھنسے 6 ہزار 860 افراد کو بروقت ریسکیو کیا گیا، سیلابی ریلوں سے سیالکوٹ کے 300 سے زائد موضع جات اور دیہات متاثرہ ہوئے ،ضلع سیالکوٹ میں 38 ریلیف کیمپ اور18فوڈ کیمپ قائم کیے گئے ہیں۔