کوہاٹ کے تھانہ لاچی کی حدود میں دہشت گردوں کے خلاف پولیس کا کامیاب آپریشن ،3 دہشت گرد ہلاک

ہفتہ 30 اگست 2025 15:07

پشاور (اُردو پوائنٹ اخبارتازہ ترین - اے پی پی۔ 30 اگست2025ء) کوہاٹ کے تھانہ لاچی کی حدود میں دہشت گردوں کے خلاف پولیس کے کامیاب آپریشن میں 3 دہشت گرد ہلاک ہو گئے ہیں۔ ہفتہ کو ریجنل پولیس آفیسر (آر پی او) عباس مجید مروت کے مطابق تھانہ لاچی کی حدود در ملک میں دہشت گردوں کے بزدلانہ حملے کے بعد پولیس نے جوابی کارروائی کرتے ہوئے تین دہشت گردوں کو ہلاک کر دیا۔

حملے میں ایک پروبیشنر اسسٹنٹ سب انسپکٹر اشفاق شہید اور دو کانسٹیبل زخمی ہوئے تھے۔ کوہاٹ پولیس کے مطابق واقعہ کی اطلاع ملتے ہی ریجنل پولیس آفیسر عباس مجید مروت اور ڈسٹرکٹ پولیس آفیسر ڈاکٹر زاہد اللّٰہ بھاری نفری کے ہمراہ فوری طور پر موقع پر پہنچ گئے اور آپریشن کی کمان سنبھال لی۔ پولیس کی نفری نے علاقے کو گھیرے میں لے کر آپریشن شروع کر دیا۔

(جاری ہے)

سنگلاخ پہاڑوں اور جنگل میں کئے گئے کامیاب آپریشن کے نتیجے میں تین دہشت گردوں کو جہنم واصل کیا گیا جن کی نعشیں برآمد کر لی گئی ہیں، دہشت گردوں کی شناخت کا عمل جاری ہے، دیگر زخمی دہشت گردوں کی تلاش کیلئے آپریشن تاحال جاری ہے۔ آر پی او عباس مجید مروت نے اس موقع پر کہا کہ ہمارے بہادر جوانوں نے دہشت گردوں کا مقابلہ کیا اور انہیں کیفر کردار تک پہنچایا، ہم اپنے شہیدوں کی قربانیوں کو رائیگاں نہیں جانے دیں گے اور دہشت گردی کے خلاف ہماری جنگ جاری رہے گی۔