پولیو کے مکمل خاتمے کیلئے عوامی شعور بیدار کرنا وقت کی ضرورت ہے، علی مدد جتک

ہفتہ 30 اگست 2025 21:00

کوئٹہ (اُردو پوائنٹ اخبارتازہ ترین - اے پی پی۔ 30 اگست2025ء) پاکستان پیپلزپارٹی کی مرکزی کمیٹی کے ممبر اور رکن بلوچستان اسمبلی حاجی علی مدد جتک نے اسسٹنٹ کمشنر سریاب آفس میں پولیو مہم کا باقاعدہ افتتاح کردیا۔ افتتاحی تقریب میں اسسٹنٹ کمشنر سریاب سمیت مختلف محکموں کے افسران، سول سوسائٹی کے نمائندگان اور میڈیا کے افراد بھی شریک تھے۔اس موقع پر حاجی علی مدد جتک نے کہا کہ پولیو جیسے موذی مرض کے خاتمے کے لیے حکومت اور عوام کو یکساں کوششیں کرنا ہوں گی۔

انہوں نے والدین پر زور دیا کہ وہ اپنے پانچ سال سے کم عمر بچوں کو انسداد پولیو کے قطرے ضرور پلائیں تاکہ آئندہ نسل کو اس مہلک بیماری سے محفوظ بنایا جا سکے۔انہوں نے مزید کہا کہ پولیو کے مکمل خاتمے کے لیے عوامی شعور بیدار کرنا وقت کی ضرورت ہے، والدین اور کمیونٹی ورکرز کی ذمہ داری ہے کہ وہ پولیو ٹیموں کے ساتھ بھرپور تعاون کریں۔

(جاری ہے)

اس موقع پر اسسٹنٹ کمشنر سریاب نے کہا کہ پولیو کے خلاف جنگ ایک قومی فریضہ ہے اور ضلعی انتظامیہ اس مہم کو کامیاب بنانے کے لیے تمام تر وسائل بروئے کار لائے گی۔

واضح رہے کہ بلوچستان کے دارالحکومت کوئٹہ سمیت تمام اضلاع میں پولیو مہم یکم ستمبر سے 7 ستمبر تک جاری رہے گی جس کے دوران پانچ سال سے کم عمر لاکھوں بچوں کو پولیو سے بچاؤ کے قطرے پلائے جائیں گے۔