Live Updates

جے یو آئی کا کراچی میں پاکستان آئیڈیل پروگرام پر شدید ردعمل

ی*غیر اخلاقی اور غیر شرعی پروگرام عذاب کو دعوت دینے کے مترادف ہیں، ترجمان جے یو آئی

اتوار 31 اگست 2025 18:40

/کراچی(اُردو پوائنٹ اخبارتازہ ترین - آن لائن۔ 31 اگست2025ء) جمعیت علمائے اسلام (جے یو آئی) نے کراچی میں پاکستان آئیڈیل کے نام سے پروگرام کے انعقاد کو شدید الفاظ میں مسترد کرتے ہوئے اسے قابلِ مذمت قرار دیا ہے۔ جے یو آئی کے ترجمان نے کہا کہ لاہور کے بعد اب کراچی میں اس قسم کے غیر اخلاقی اور غیر شرعی پروگرام ملک میں عذاب کو دعوت دینے کے مترادف ہیں۔

ترجمان جے یو آئی اسلم غوری کا کہنا تھا کہ حکومتی سطح پر غیر اخلاقی پروگرام کروا کر قوم اور نوجوان نسل کو گمراہ کیا جارہا ہے۔

(جاری ہے)

ان کے مطابق، اسلام کے نام پر حاصل کیے گئے ملک میں اس طرح کے شوز منعقد کر کے آزادی اور قربانیاں دینے والوں کے جذبے کا مذاق اڑایا جا رہا ہے۔انہوں نے کہا کہ موجودہ صورتحال میں جب پورا ملک سیلاب کی تباہ کاریوں سے دوچار ہے، لاکھوں خاندان بے گھر اور سینکڑوں افراد شہید ہوچکے ہیں، حکمرانوں کا میوزک شوز منعقد کرانا افسوسناک ہے۔

اسلم غوری نے دعویٰ کیا کہ سیلاب کے باعث 22 لاکھ سے زائد افراد اپنے گھروں سے محروم ہو چکے ہیں جبکہ متاثرہ عوام مشکلات میں گھری ہوئی ہے۔جے یو آئی نے حکومت سے مطالبہ کیا ہے کہ فوری طور پر ایسے غیر شرعی پروگرام بند کیے جائیں اور عوامی مسائل حل کرنے پر توجہ دی جائے۔