ملک میں سیلاب کی وجہ سے حکومت کی 4 ہزار 800 ارب روپے قرض لینے کی تیاری

اسلام آباد ( اُردو پوائنٹ اخبارتازہ ترین۔ 02 ستمبر 2025ء ) ملک میں جاری سیلابی صورتحال کے باعث حکومت نے 4 ہزار 800 ارب روپے قرض لینے کی تیاری کرلی۔ ڈان نیوز کے مطابق سیلاب کی وجہ سے معاشی اثرات کے بعد مالی دباؤ میں اضافہ ہو رہا ہے، جس کے پیش نظر حکومت نے ستمبر سے نومبر کے عرصے میں اپنی مالیاتی ضروریات کو پورا کرنے کے لیے بینکوں اور کیپٹل مارکیٹس سے تقریباً 4 ہزار 800 ارب روپے قرض لینے کا منصوبہ بنایا ہے۔

اسٹیٹ بینک کے جاری کردہ اعداد و شمار سے پتا چلا ہے کہ اس قرض میں 2 ہزار 875 ارب روپے ٹریژری بلز اور 2 ہزار ارب روپے پاکستان انویسٹمنٹ بانڈز (پی آئی بیز) کے ذریعے حاصل کیے جائیں گے، پی آئی بیز کے ہدف میں سے ایک ہزار 200 ارب روپے فکسڈ ریٹ بانڈز، 750 ارب روپے فلوٹنگ ریٹ انسٹرومنٹس کے ذریعے لیے جائیں گے، ٹی بلز کی نیلامی کے شیڈول کے تحت حکومت کا ارادہ ہے کہ 12 ماہ کے بلز سے 900 ارب روپے، 6 ماہ اور 3 ماہ کے بلز سے 750، 750 ارب روپے، ایک ماہ کے ٹی بلز سے اضافی 475 ارب روپے حاصل کیے جائیں۔

(جاری ہے)

بتایا گیا ہے کہ حکومت نے بینک قرضوں کے ساتھ کیپٹل مارکیٹ سے بھی بڑھتی ہوئی شرح سے فنڈز حاصل کیے ہیں، 17 اگست کو پاکستان سٹاک ایکسچینج کے ذریعے ایک سے پانچ سالہ سکوک کی نیلامی کرکے 119 ارب روپے حاصل کیے گئے، اس سے قبل 5 دسمبر 2024ء کو حکومت نے اسی طرح 2 ہزار ارب روپے سکوک اور ایک ہزار 400 ارب روپے پی آئی بیز کے ذریعے اکٹھے کیے تھے، یہ قرض لینے سے ملک کے مالیاتی چیلنجز کا پتا چلتا ہے، مئی 2025ء تک مقامی قرضہ 53 ہزار 460 ارب روپے تک پہنچ گیا تھا جو ایک سال پہلے 46 ہزار 120 ارب روپے تھا یعنی اس مدت میں 7 ہزار 340 ارب روپے کا اضافہ ہوا۔

اس حوالے سے مزید یہ بھی معلوم ہوا ہے کہ مالی سال 2025ء میں قرض کی ادائیگی کا تخمینہ 9 ہزار ارب روپے رہا جو وفاقی بجٹ کا تقریباً نصف ہے، تاہم ملک کی موجودہ صورتحال میں ماہرین کا کہنا ہے کہ حالیہ سیلاب کے بعد صورت حال مزید خراب ہوسکتی ہے جس نے بنیادی ڈھانچے اور زرعی شعبے کو شدید نقصان پہنچایا ہے، حکومت کو مزید قرض لینا پڑے گا کیوں کہ سیلاب سے متعلق رکاوٹوں کی وجہ سے محصولات کی وصولی کم ہونے کا خدشہ ہے۔