آئیسکو چیف ایگزیکٹو انجینئر چوہدری خالد محمود کے کسٹمر فیسلٹیشن سینٹرز اور کمپلینٹ دفاتر کے ہنگامی دورے

اتوار 31 اگست 2025 19:40

اسلام آباد (اُردو پوائنٹ اخبارتازہ ترین - اے پی پی۔ 31 اگست2025ء) چیف ایگزیکٹیو آئیسکو انجینئر چودھری خالد محمود نے سینیئر افسران کے ہمراہ آئیسکو ریجن میں قائم مختلف کسٹمر فیسلٹیشن سینٹرز اور کمپلینٹ دفاتر کے اچانک اور ہنگامی دورے کیے ،صارفین سے ملے اور ان کے مسائل دریافت کیے ان دوروں کا مقصد صارفین کو فراہم کی جانے والی سروسز کے معیار کی مانیٹرنگ کرنا اور افسران و اہلکاران کی کارکردگی پر براہِ راست نظر رکھنا تھا۔

انجینیر چوہدری خالد محمود نے اس موقع پر کہا کے آئیسکو انتظامیہ معزز صارفین کو بہترین سروسز اور سہولیات فراہم کرنے کے لیے ہر ممکن اقدامات کر رہی ہے اور اس سلسلے میں آئیسکو کے چیئرمین ڈاکٹر طاہر مسعود اور دیگر بورڈ ممبران کی سوچ بے حد مثبت اور صارف دوست ہے۔

(جاری ہے)

انہوں نے کہا کے ہمارا اولین مقصد کوالٹی سروسز فراہم کر کے صارفین کا اعتماد جیتنا ہے۔

انہوں نے بتایا کے حکومت پاکستان اور وزارت توانائی پاور ڈویژن کے ویژن پر عمل کرتے ہوئے آئیسکو کے ہر شعبہ میں جدید ٹیکنالوجی سے استفادہ کیا جا رہا ہے جس کے باعث صارفین کو نہ صرف گھر بیٹھے آن لائن سروسز میسر آئی ہیں بلکہ شفافیت کو بھی فروغ ملا ہے اور صارفین کا آئیسکو کی کارکردگی پر اعتماد مزید بڑھا ہے۔ چیف ایگزیکٹیو نے سختی سے تنبیہ کی کہ کسی بھی قسم کی سستی، غفلت یا لاپرواہی برداشت نہیں کی جائے گی۔

تمام افسران اور اہلکاران اپنی ذمہ داریاں پوری دیانتداری اور محنت سے سر انجام دیں، سو فیصد درست میٹر ریڈنگ، بروقت بجلی بلوں کی ترسیل، بجلی کی بلا تعطل فراہمی، فالٹز اور ٹرپینگ کی درستگی اور دفاتر میں آنے والے صارفین کی شکایات کا فوری ازالہ یقینی بنایا جائے تاکہ آئیسکو کی کارکردگی مزید بہتر ہو اور صارفین کا ادارے پر اعتماد مزید مستحکم ہو۔