Live Updates

حالیہ سیلاب سے معیشت متاثر ہو گی ، ہر صوبہ 5ارب ڈالر کی برآمدات کی صلاحیت رکھتا ہے،خادم حسین

پیر 1 ستمبر 2025 12:58

اسلام آباد (اُردو پوائنٹ اخبارتازہ ترین - اے پی پی۔ 01 ستمبر2025ء) پاکستان سٹون ڈویلپمنٹ کمپنی کے بورڈ آف ڈائریکٹر کے رکن خادم حسین نے کہا ہے کہ اقتصادی ڈھانچے کی بنیادی سطح پر تنظیم نو کی اشد ضرورت ہے تاکہ پاکستان اپنی ترقی کی مکمل صلاحیت بروئے کار لا سکے۔ پیر کو اپنے ایک بیان میں انہوں نے کہا کہ پاکستان کا ہر صوبہ 5ارب ڈالر کی برآمدات کرنے کی صلاحیت رکھتا ہے ،مجموعی حالات کا جائز ہ لیا جائے تو اب پاکستان کو بھرپور توجہ سے معاشی جنگ لڑنی ہوگی۔

(جاری ہے)

انہوں نے کہا کہ سٹیٹ بینک کو پالیسی ریٹ کو بتدریج سنگل ڈیجٹ میں لانا چاہیے کیونکہ کم شرح سود سرمایہ کاری کو فروغ دے گی اور صنعتی سرگرمیوں کو تیز کرے گی۔ انہوں نے کہا کہ حالیہ سیلاب نے معیشت کو شدید متاثر کیا ہے جو باعث تشویش ہے۔ انہوں نے کہا کہ پاکستان کی ترقی کے امکانات کو لاحق نقصان کو کم کرنے کے لیے پانی کے تحفظ اور بنیادی ڈھانچے میں فوری اصلاحات نا گزیر ہیں،حالیہ سیلاب سے معاشی نقصانات کا فوری طور پر تخمینہ لگانا مشکل ہے لیکن ابتدائی جائزے یہ ظاہر کرتے ہیں کہ 2022کے سیلاب جس سے تقریباً 40ارب امریکی ڈالر کا نقصان ہوا تھا حالیہ نقصان اس سے کہیں زیادہ ہونے کا خدشہ ہے ۔