اسلام آباد کی ایک اور انفلوئنسر ثناء یوسف جیسی صورتحال کا شکار

سامعیہ حجاب نے سوشل میڈیا پر سارا واقعہ بیان کرتے ہوئے اپنے گھر کے سی سی ٹی وی فوٹیج اور مبینہ ملزم کی تصویر بھی شیئر کردی

ساجد علی پیر 1 ستمبر 2025 15:25

اسلام آباد کی ایک اور انفلوئنسر ثناء یوسف جیسی صورتحال کا شکار

اسلام آباد ( اُردو پوائنٹ اخبارتازہ ترین۔ 01 ستمبر 2025ء ) وفاقی دارالحکومت اسلام آباد کی رہائشی ایک اور انفلوئنسر ٹک ٹاکر مرحومہ ثناء یوسف جیسی صورتحال کا شکار ہوگئی۔ تفصیلات کے مطابق اسلام آباد کی 17 سالہ ٹک ٹاکر ثناء یوسف کے قتل کی وجوہات بننے والا اب ایک اور واقعہ سامنے آیا ہے، اب کی بار انفلوئنسر سامعیہ حجاب کو بھی اسی نوعیت کی دھمکیوں اور ہراسانی کا سامنا ہے جن کا شکار ثناء یوسف رہی تھی، سوشل میڈیا پر ایک ویڈیو میں سارا واقعہ بیان کرتے ہوئے سامعیہ حجاب نے اپنے گھر کے سی سی ٹی وی فوٹیج بھی شیئر کی، جس میں واقعے کو واضح طور پر دیکھا جا سکتا ہے، اس کے علاوہ ان کی جانب سے مبینہ ملزم کی تصویر بھی جاری کی گئی۔

اسلام آباد کی ایک اور انفلوئنسر ثناء یوسف جیسی صورتحال کا شکار !!#Pakistan #Islamabad #sanayousaf pic.twitter.com/D51sF4YDV0
— SAJID ALI (@SajidAli03) September 1, 2025

اس حوالے سے مرحومہ ثناء یوسف کی قریبی دوست سامعیہ حجاب نے انکشاف کیا ہے کہ لاہور کا رہائشی حسن زاہد نامی شخص کئی دنوں سے میرا پیچھا کر رہا ہے، یہ شخص ناصرف مجھے ہراساں کرتا رہا ہے بلکہ ایک موقع پر یہ میرے گھرآیا اور زبردستی مجھے اپنی گاڑی میں بٹھا کر لے گیا۔

(جاری ہے)

سوشل میڈیا پر وائرل ویڈیو میں انہوں نے کہا کہ میں اس معاملے پر خاموش نہیں رہنا چاہتی کیوں کہ میں نہیں چاہتی کہ میرا انجام بھی ثناء یوسف جیسا ہو، اس لیے میں نے اس شخس کے خلاف اسلام آباد پولیس میں ایف آئی آر درج کروا دی ہے اور میرا حکام سے مطالبہ ہے کہ مجھے مکمل تحفظ فراہم کیا جائے اور ملزم کو فی الفور گرفتار کیا جائے۔