منظر نقوی کے بھائی سید منور حسین نقوی انتقال کر گئے،کراچی ایڈیٹرز کلب کا اظہار تعزیت

کراچی(اُردو پوائنٹ اخبارتازہ ترین - این این آئی۔ 01 ستمبر2025ء)فنانشل ڈیلی انٹرنیشنل کے ریذیڈنٹ ایڈیٹر سید منور حسین نقوی اسلام آباد میں 74 برس کی عمر میں انتقال کر گئے۔ کراچی ایڈیٹرز کلب نے سید منور حسین نقو ی کے انتقال پر گہرے دکھ اور افسوس کا اظہار کیا ہے ۔تفصیلات کے مطابق فنانشل ڈیلی انٹرنیشنل کے ریذیڈنٹ ایڈیٹر اور کراچی ایڈیٹرز کلب کے سیکرٹری جنرل سید منظر نقوی کے بھائی سید منور حسین نقوی74برس کی عمر میں انتقال کرگئے ۔

انہیں اسلام آباد میں سپردِ خاک کیا گیا، جہاں اہلِ خانہ، دوست احباب، صحافتی برادری اور دیگر شرکا نے ان کی نمازِ جنازہ میں شرکت کی۔مرحوم سید منور حسین نقوی نے صحافت کا آغاز ڈیلی سن کراچی سے کیا اور بعد ازاں ڈیلی سن لاہور، ڈیلی مسلم اسلام آباد اور دی نیشن اسلام آباد کے ساتھ منسلک رہے۔

(جاری ہے)

انہوں نے ہائر ایجوکیشن کمیشن (ایچ ای سی)میں بھی طویل خدمات سر انجام دیں، جہاں وہ Higher Education News کے ایڈیٹر رہے اور ترقی پا کر ڈائریکٹر اکیڈمک کے عہدے پر فائز ہوئے۔

ریٹائرمنٹ کے وقت وہ اسی عہدے پر تعینات تھے۔ریٹائرمنٹ کے بعد انہوں نے دوبارہ صحافت کا آغاز کیا اور پاکستان کے معروف انگریزی اخبارات میں اپنی خدمات انجام دیں۔ فنانشل ڈیلی انٹرنیشنل میں وہ نہ صرف ریذیڈنٹ ایڈیٹر تھے بلکہ ایک مقبول ہفتہ وار کالم "کیپیٹل واچ" بھی لکھتے تھے، جس میں سیاسی، معاشی اور سماجی امور پر گہری بصیرت کا اظہار کرتے تھے۔

مرحوم اپنے پسماندگان میں اہلیہ، بیٹے عباس نقوی اور بیٹی صدف نقوی کو سوگوار چھوڑ گئے ہیں۔ ان کے انتقال پر اہل خانہ، ساتھی صحافیوں اور دوست احباب نے گہرے رنج و غم کا اظہار کیا ہے۔کراچی ایڈیٹرز کلب کے صدر مبشر میر ، آغا مسعود حسین،کرنل (ر)مختار بٹ،اقبال جمیل،نعیم طاہر،زیڈ ایچ خرم،نعیم الدین اور ایگزیکٹو کمیٹی کے اراکین نے سید منور حسین نقوی کے انتقال پر گہرے دکھ اور افسوس کا اظہار کیا ہے ۔

انہوںنے کہا کہ منور حسین نقوی صحافت کی دنیا کا ایک بڑا نام تھے ۔مرحوم کی صحافتی خدمات کو ہمیشہ یاد رکھا جائے گا ۔کراچی ایڈیٹرز کلب کے عہدیداران نے دعا کی کہ اللہ تعالی مرحوم کو جنت الفردوس میں اعلی مقام عطا فرمائے اور ان کی لغزشوں کو معاف فرمائے۔ مرحوم کے ایصالِ ثواب کے لیے تمام احباب سے سور الفاتحہ پڑھنے کی درخواست ہے۔