Live Updates

لاہور،راوی کنارے فارم ہاؤس میں سیلاب میں پھنسے 6 شیروں کو ریسکیو کرلیا گیا

مریم اورنگزیب نے سیلابی پانی میں پھنسے شیروں کو کامیاب آپریشن کے بعد بحفاظت ریسکیو کرنے پر شاباش دی

پیر 1 ستمبر 2025 16:43

لاہور (اُردو پوائنٹ اخبارتازہ ترین - این این آئی۔ 01 ستمبر2025ء)لاہور میں ملتان روڈ پر راوی کنارے واقع فارم ہاؤس میں سیلابی پانی میں پھنسے 6 شیروں کو ریسکیو کرلیا گیا۔میڈیا رپورٹ کے مطابق سیکرٹری وائلڈ لائف مدثر ریاض کی نگرانی میں ملتان روڈ پر راوی کنارے واقع فارم ہاؤس میں سیلابی پانی میں پھنسے 6 شیروں کو ریسکیو کرنے کا آپریشن کامیابی سے مکمل کیا گیا۔

(جاری ہے)

ریسکیو آپریشن میں وائلڈ لائف رینجرز اور وائلڈ لائف ریسکیو فورس نے حصہ لیا، 4 کشتیاں اور ویٹرنری ڈاکٹرز بھی موجود تھے، طوفانی بارش اور پانی کے دباؤ کے باوجود شیروں کو بحفاظت ریسکیو کیا گیا۔محفوظ مقام پر منتقل کیے گئے تمام شیروں کا فوری میڈیکل چیک اپ شروع کر دیا گیا، شیروں کی صحت کی مسلسل مانیٹرنگ کی جارہی ہے۔پنجاب کی سینئر وزیر مریم اورنگزیب نے سیلابی پانی میں پھنسے شیروں کو کامیاب آپریشن کے بعد بحفاظت ریسکیو کرنے پر شاباش دی۔مریم اورنگزیب نے واضح کیا کہ جنگلی حیات کا تحفظ حکومت پنجاب کی اولین ترجیح ہے، کسی جاندار کو مشکل میں اکیلا نہیں چھوڑا جائے گا، بہادر وائلڈ لائف رینجرز اور وائلڈ لائف ریسکیو فورس قوم کا فخر ہیں۔