قومی اسمبلی کی ہائوس بزنس ایڈوائزری کمیٹی اجلاس،19 ویں اجلاس کو سیلابی صورتحال کے حوالے سے مختصر رکھنے کا فیصلہ

پیر 1 ستمبر 2025 18:11

اسلام آباد (اُردو پوائنٹ اخبارتازہ ترین - اے پی پی۔ 01 ستمبر2025ء) سپیکر قومی اسمبلی سردار ایاز صادق کی زیر صدارت قومی اسمبلی کے 19ویں اجلاس کے لئے ایڈوائزری کمیٹی کا اجلاس پیر کو پارلیمنٹ ہائوس میں منعقد ہوا۔ اجلاس میں قومی اسمبلی کے 19 ویں اجلاس کے ایجنڈے اور دورانیے پر تبادلہ خیال کیا گیا۔قومی اسمبلی کے 19 ویں اجلاس میں پاکستان کو درپیش وسیع اور شدید سیلابی صورتحال پر غور کیا جائے گا۔

ایڈوائزری کمیٹی نے قومی اسمبلی کے موجودہ 19 ویں اجلاس کو سیلابی صورتحال کے حوالے سے مختصر رکھنے کا فیصلہ کیا گیا۔قومی اسمبلی کے 19 ویں اجلاس میں وقفہ سوالات کو موخر کر کے سیلابی صورتحال پر خصوصی بحث کی جائے گی۔سپیکر قومی اسمبلی سردار ایاز صادق نے کہا کہ میری خواہش ہے کہ اپوزیشن ارکان قائمہ کمیٹیوں کا حصہ رہیں۔

(جاری ہے)

سپیکر قومی اسمبلی سردار ایاز صادق نے اپوزیشن اراکین کو قومی اسمبلی قائمہ کمیٹیوں سے مستعفی ہونے کے فیصلے پر غور کرنے کا کہا۔

اجلاس میں ڈپٹی اسپیکر قومی اسمبلی سید غلام مصطفی شاہ، وفاقی وزیر ڈاکٹر طارق فضل چوہدری ، ممبر قومی اسمبلی سید نوید قمر، شیخ آفتاب احمد، خالد حسین مگسی، اعجاز حسین جاکھرانی، سید حفیظ الدین، پولین بلوچ، گل اصغرخان، نزہت صادق اور سیدہ شہلا رضا نے شرکت کی۔