ڈاکٹر عافیہ صدیقی کیس کی سماعت کیلئے بننے والا نیا بینچ بھی ٹوٹ گیا

پیر 1 ستمبر 2025 21:35

اسلام آباد (اُردو پوائنٹ اخبارتازہ ترین - این این آئی۔ 01 ستمبر2025ء)ڈاکٹر عافیہ صدیقی کیس کی سماعت کے لیے بننے والا اسلام آباد ہائی کورٹ کا نیا بینچ بھی ٹوٹ گیا۔ڈاکٹر عافیہ صدیقی کی صحت اور وطن واپسی سے متعلق ڈاکٹر فوزیہ صدیقی کی درخواست پر سماعت اسلام آباد ہائی کورٹ کے جسٹس انعام امین منہاس نے کی۔درخواست گزار ڈاکٹر فوزیہ صدیقی کے وکیل عمران شفیق ایڈووکیٹ عدالت میں پیش ہوئے۔

دوران سماعت جسٹس انعام منہاس نے ریمارکس دیے کہ میں اس معاملے پر لارجر بینچ کی تشکیل کے لیے فائل چیف جسٹس کو بھجوا رہا ہوں، اس کیس کا فیصلہ سنگل بینچ نہیں، لارجر بینچ کرے گا۔درخواست گزار کے وکیل عمران شفیق نے کہا کہ لارڈ شپ یہ معاملہ کافی پیچیدہ ہو گیا ہے۔ جسٹس انعام امین منہاس نے کہا کہ کوئی پیچیدہ نہیں ہوا، میرا اپنا فیصلہ روسٹر سے متعلق موجود ہے، چیف جسٹس کے ماسٹر آف روسٹر کے حوالے سے میرا فیصلہ موجود ہے۔

(جاری ہے)

وکیل عمران شفیق نے جسٹس انعام امین منہاس سے کہا کہ آپ نے کہا ہے کہ چیف جسٹس ماسٹر آف روسٹر ہی میں نے یہ فیصلہ نہیں پڑھا۔جسٹس انعام امین منہاس نے کہا کہ منیب صاحب کی بھی یہی رائے تھی میں نے بھی وہی فیصلہ دیا ہے، میرا فیصلہ ہے ماسٹر آف روسٹر چیف جسٹس ہے، دوسری رائے یہ آئی کہ وہ نہیں ہیں، اب دو آراء کی وجہ سے یہ معاملہ لارجر بینچ کو بھیج رہا ہوں، ماسٹر آف روسٹر کون ہے یہ لارجر بینچ طے کرے گاجس کے بعد چیف جسٹس کے ماسٹر آف روسٹر ہونے کے نکتے پر لارجر بینچ تشکیل دینے کا فیصلہ کرلیا گیا۔

اس سے قبل جسٹس سردار اعجاز اسحاق نے عدالتی حکم عدولی پر وزیراعظم و کابینہ کو توہین عدالت نوٹس جاری کیے تھے۔ڈاکٹر عافیہ صدیقی کیس جسٹس سردار اعجاز اسحاق کی کورٹ سے جسٹس انعام امین منہاس کی عدالت منتقل کیا گیا تھا تاہم اب ڈاکٹر عافیہ صدیقی کیس کی سماعت کے لیے جسٹس انعام امین منہاس کا نیا بننے والا بینچ بھی ٹوٹ گیا۔