Live Updates

کالا باغ ڈیم پر وزیر اعلی خیبرپختونخوا کے جذبات خوش آئند ہیں ، عبدالعلیم خان

منگل 2 ستمبر 2025 18:28

لاہور (اُردو پوائنٹ اخبارتازہ ترین - اے پی پی۔ 02 ستمبر2025ء) وفاقی وزیر مواصلات اور استحکام پاکستان پارٹی کے صدر عبدالعلیم خان نے کالا باغ ڈیم کی تعمیر پر خیبر پختونخواکے وزیر اعلی علی امین گنڈا پور کے جذبات کو خوش آئندقرار دیتے ہوئے کہا ہے کہ بشمو ل کالا باغ نئے ڈیمز تمام صوبوں کی مشاورت سے بننے چاہئیں اور چاروں صوبائی اسمبلیوں اور وزرائے اعلی کو باہم مل کر نئے ڈیمز کی تعمیر کے مسئلے کا حل نکالنا چاہیے۔

وفاقی وزیر عبدالعلیم خان نے اپنے بیان میں کہا کہ وزیر اعلی خیبر پختونخواکی طرف سے کالا باغ ڈیم کی تعمیر کی حمایت کو سراہتے ہیں کیونکہ مستقبل میں آبی بحران اور سیلاب جیسی قدرتی آفت سے بچا کے لئے نئے ڈیمز کا بنانا ضروری ہے۔ انہوں نے کہا کہ نئے ڈیموں سے کھربوں روپے کے پانی کے ضیاع کو محفوظ بنایا جا سکتا ہے، سیلاب کسی ایک صوبے کا نہیں اب سارے ملک کا مسئلہ بن چکا ہے۔

(جاری ہے)

عبدالعلیم خان نے کہا کہ سارا پاکستان موسمیاتی تبدیلیوں اور اس کے منفی اثرات کی لپیٹ میں ہے،گلگت بلتستان، خیبر پختونخوا اور پنجاب میں ہونے والی طوفانی بارشوں سے بڑے پیمانے پر جانی و مالی نقصان ہوا جو انتہائی قابل افسوس ہے۔انہوں نے کہا کہ چاروں صوبوں میں چھوٹے ڈیموں کی فوری تعمیر نا گزیر ہو چکی ہے جس کے لئے ہمیں ہنگامی بنیادوں پر کام کرنا ہوگا۔

صدر استحکام پاکستان پارٹی عبدالعلیم خا ن نے کہا کہ ملک کو آئندہ سیلاب سے بچانا ہم سب کی مشترکہ ذمہ داری ہے اور اس ضمن میں قومی اتفاق رائے پیدا کرنے کے لئے ان کی جماعت استحکام پاکستان پارٹی بھی اپنا بھرپور کردار ادا کرنے کو تیار ہے۔ عبدالعلیم خان نے کہا کہ چھوٹے ڈیموں کی تعمیر کے لئے ہم سب کو متحد ہو کر کام کرنا ہوگا جس کے لئے ملکی سطح پر جامع پالیسی کی تشکیل ضروری امر ہے جبکہ الگ الگ رہنے سے اس طرح کے قومی مسائل کا حل ممکن نہیں۔