سی پیک 2.0 پاکستان اور چین کے تعلقات کو نئی بلندیوں پر لے جائے گا، احسن اقبال

منگل 2 ستمبر 2025 18:49

تیانجن(اُردو پوائنٹ اخبارتازہ ترین - آن لائن۔ 02 ستمبر2025ء) شنگھائی تعاون تنظیم (ایس سی او) کے سربراہی اجلاس کے موقع پر وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال نے کہا ہے کہ سی پیک 2.0 پاکستان اور چین کے تعلقات کو نئی بلندیوں پر لے جائے گا، جس کے تحت پاکستان کی بندرگاہوں، قابلِ تجدید توانائی اور لائیو اسٹاک کے شعبوں کو مضبوط بنانے کے بے شمار مواقع موجود ہیں۔

وفاقی وزیر نے تیانجن میں ہوان شینگ نیو انرجی سولر پلانٹ کا دورہ کیا اور اسے چوتھی صنعتی انقلاب کی سطح کا خودکار منصوبہ قرار دیا۔ ان کا کہنا تھا کہ پاکستان بھی چین کے جدید توانائی منصوبوں سے بھرپور فائدہ اٹھائے گا۔احسن اقبال نے کہا کہ پاکستان زرعی شعبے میں بایو ٹیکنالوجی کے فروغ کے لیے چین کے تجربے سے استفادہ کرے گا اور اس مقصد کے لیے مشترکہ پلیٹ فارمز تشکیل دیے جا رہے ہیں۔

(جاری ہے)

ان کے مطابق مستقبل سولر اور گرین انرجی کا ہے اور پاکستان چینی کمپنیوں کو سرمایہ کاری کی دعوت دیتا ہے۔انہوں نے بتایا کہ پاکستان میں جدید ریسرچ سینٹرز قائم کیے جا رہے ہیں جو مستقبل کی ترقی کی ضمانت ہوں گے۔ اس دوران وفاقی وزیر نے چین کی ایک بڑی ویکسین کمپنی کا بھی دورہ کیا جس نے پاکستان میں پلانٹ لگانے کی پیشکش کی ہے۔احسن اقبال نے کہا کہ لائیو اسٹاک پاکستان کی زرعی معیشت کا مضبوط ستون ہے اور جانوروں کو بیماریوں سے پاک کر کے گوشت کی برآمدات بڑھانا اہم ہدف ہے۔وفاقی وزیر نے پرزور انداز میں کہا کہ: سی پیک 2.0 سے پاکستان اور چین کا تعاون نئی بلندیوں کو چھوئے گا۔