کیمبرج یونیورسٹی پریس اینڈ اسیسمنٹ نے کلائمیٹ کویسٹ کا پاکستان ایڈیشن متعارف کرا دیا

اسلام آباد (اُردو پوائنٹ اخبارتازہ ترین - اے پی پی۔ 02 ستمبر2025ء) کیمبرج یونیورسٹی پریس اینڈ اسیسمنٹ نے کلائمیٹ کویسٹ کا پاکستان ایڈیشن متعارف کرایا ہے جو ایک انقلابی ماحولیاتی تعلیمی پروگرام ہے جس کا مقصد نوجوان طلبہ کو علم، مہارت اور اعتماد فراہم کرنا ہے تاکہ وہ ماحولیاتی بحران کا سامنا کر سکیں۔یہ پروگرام کیمبرج زیرو (یونیورسٹی آف کیمبرج) اور لاہور یونیورسٹی آف مینجمنٹ سائنسز (لمز) کے اشتراک سے تیار کیا گیا ہے۔

پاکستان ایڈیشن کیمبرج کے عالمی عزم کا حصہ ہے جس کا مقصد ہر سطح پر ماحولیاتی تعلیم کو نصاب میں شامل کرنا ہے۔یہ مفت 2.5 گھنٹے کا آن لائن کورس جو اپنی رفتار سے مکمل کیا جا سکتا ہے، آٹھویں سے بارہویں جماعت تک کے طلبہ کے لیے ڈیزائن کیا گیا ہے اور تمام تعلیمی بورڈز بشمول سرکاری سکولوں کے لیے دستیاب ہے۔

(جاری ہے)

کورس ماحولیاتی تبدیلی کے بارے میں بنیادی آگاہی فراہم کرتا ہے اور عالمی سائنس کو پاکستان کے اہم مسائل جیسے 2010ء کے سیلاب، 2017ء کی ہیٹ ویو، لاہور کی فضائی آلودگی اور قومی پالیسیوں (مثلاً سیلاب سے بچائو کے منصوبے) سے جوڑتا ہے۔

کلائمیٹ کویسٹ طلبہ کو یہ صلاحیت دیتا ہے کہ وہ اپنی تعلیم کو عملی منصوبوں میں ڈھالیں اور پائیداری و ماحولیاتی لچک کو فروغ دینے کے لیے اپنی کمیونٹی میں اقدامات کریں۔پاکستان میں ہونے والی افتتاحی تقریب میں سکولوں کے سربراہان، پالیسی ساز، صحافی اور وزارتِ ماحولیات کے نمائندے شریک ہوئے۔ اس موقع پر وزیر اعظم کی کوآرڈینیٹر برائے ماحولیاتی تبدیلی رومینہ خورشید عالم ، وزیر ابتدائی و ثانوی تعلیم خیبر پختونخوا فیصل خان تراکئی اور پارلیمانی سیکرٹری برائے وزارت قومی تعلیم و پیشہ ورانہ تربیت فرح ناز اکبر موجود تھیں۔

چیف ایگزیکٹو کیمبرج یونیورسٹی پریس اینڈ اسیسمنٹ پیٹر فلپس نے کہا کہ پاکستان ماحولیاتی بحران کی فرنٹ لائن پر ہے، لیکن یہ دنیا کی سب سے بڑی نوجوان آبادی میں سے ایک کا بھی گھر ہے، جو لچک، جدت اور صلاحیتوں سے بھری ہوئی ہے۔ کلائمیٹ کویسٹ کے ذریعے ہم چاہتے ہیں کہ طلبہ نہ صرف ماحولیاتی تبدیلی کی سائنس کو سمجھیں بلکہ اپنے کمیونٹیز میں حقیقی فرق ڈالنے والے حل بھی تیار اور قیادت کریں، پاکستان میں کیمبرج کی کنٹری ڈائریکٹر عظمیٰ یوسف نے کہا:"کلائمیٹ کویسٹ پاکستان صرف ایک پروگرام نہیں بلکہ عمل کے لیے ایک پکار ہے، یہ ہماری آئندہ نسلوں کے لیے ہے تاکہ وہ آج اور کل کے چیلنجز سے نمٹنے کے لیے ماحولیاتی لچک اور ڈھلنے کی صلاحیت رکھتے ہوں۔

جب ہم مقامی تناظر کو عالمی تعلیم کے ساتھ جوڑتے ہیں تو ہم طلبہ کو اپنے آپ کو ماحولیاتی رہنما اور اپنی کمیونٹیز کے سفیر کے طور پر دیکھنے کے قابل بناتے ہیں۔"افتتاحی تقریب میں ایک پینل ڈسکشن بھی شامل تھی جس کی میزبانی طلعت حسین نے کی۔ پینل میں ڈاکٹر مہرین مجتبیٰ (ڈائریکٹر کلائمیٹ چینج، نیوٹریشن اینڈ ہیلتھ، وزارت نیشنل ہیلتھ سروسز، ریگولیشنز اینڈ کوآرڈینیشن اور سابق وفاقی وزیر/وزیر اعظم کے مشیر برائے ماحولیاتی تبدیلی ملک امین اسلم شامل تھے۔

پینل ڈسکشن کا موضوع "کلاس روم میں ماحولیات: ایک لچکدار مستقبل کے لیے تعلیم" تھا۔یہ اقدام عالمی فریم ورک کا حصہ ہے، کلائمیٹ کویسٹ مزید ممالک اور عمر کے گروپس تک توسیع پائے گا اور مواد و اسیسمنٹس کو تازہ ترین سائنسی تحقیق کے مطابق اپ ڈیٹ کیا جاتا رہے گا۔