سپریم کورٹ نے گھر کی ملکیت کے دعوے سے متعلق کیس کا فیصلہ محفوظ کرلیا

منگل 2 ستمبر 2025 18:18

اسلام آباد (اُردو پوائنٹ اخبارتازہ ترین - این این آئی۔ 02 ستمبر2025ء)سپریم کورٹ آف پاکستان نے گھر کی ملکیت کا دعویٰ، کرایہ دار کے خلاف ڈیفالٹ کرایہ ادا نہ کرنے سے متعلق کیس کا فیصلہ محفوظ کر لیا۔چیف جسٹس یحییٰ آفریدی کی سربراہی میں 3 رکنی بینچ نے کیس کی سماعت کی۔چیف جسٹس یحییٰ آفریدی نے درخواست گزار کے وکیل کو درخواست واپس لینے کا مشورہ دیتے ہوئے کہا کہ درخواست گزار کو کہیں کہ درخواست واپس لے لیں، کیس چلاتے ہیں تو مسئلہ ہو گا، درخواست گزار کون ہیں کیا عدالت آئی ہیں درخواست گزار کے وکیل نے کہا کہ درخواست گزار بیرون ملک مقیم ہیں، اگر آپ کہتے ہیں تو انہیں بلا لیتا ہوں۔

چیف جسٹس یحییٰ آفریدی نے کہا کہ اپنی موکلہ کا شناختی کارڈ اور پاسپورٹ تحریری جمع کروا دیں۔

(جاری ہے)

وکیل نے کہا کہ میں سارے دستاویزات جمع کروا دوں گا، ایک دن کا وقت درکار ہے۔گھر کا اصل مالک عدالت میں پیش ہوا، گھر کی رجسٹری عدالت میں جمع کروا دی۔چیف جسٹس نے درخواست گزار کے وکیل سے استفسار کیا کہ یہ کہہ رہے ہیں کہ اس گھر میں رہائش پذیر ہیں، آپ کہہ رہے ہیں گھر کا مالک کوئی اور ہے، چل کیا رہا ہے، ہم کسی کو عدالت کی بیحرمتی کرنے کی اجازت نہیں دیں گے۔درخواست گزار کے وکیل نے کہا کہ جس نے بھی عدالتی احکامات نہیں مانے اس پر مقدمہ ہونا چاہیے۔ چیف جسٹس یحییٰ آفریدی نے ریمارکس دیے کہ وہ ہم دیکھ لیں گے، مقدمہ کس پر ہونا ہے، مناسب فیصلہ جاری کر دیں گے۔