پشاور میں موسلادھار بارش سے بدھنی نالے میں طغیانی، پانی گھروں میں داخل

پشاور(اُردو پوائنٹ اخبارتازہ ترین - این این آئی۔ 02 ستمبر2025ء)پشاور سمیت خیبر پختونخوا کے بیشتر علاقوں میں بارش اور طغیانی کی وجہ سے نشیبی علاقوں میں پانی گھروں کے اندر داخل ہوگیا۔پشاور کے بدھنی نالہ کے آس پاس علاقوں میں پانی زیادہ ہونے کی وجہ سے پانی گھروں کے اندر داخل ہوا جس کے باعث لوگوں کے لاکھوں روپے کے نقصانات بھی ہوئے۔شہریوں کا کہنا تھا کہ بڈھنی نالے کی عدم صفائی کی وجہ سے جب بھی پانی زیادہ ہوتا ہے تو پانی گھروں کے اندر داخل ہوتا ہے جس سے ان کے لاکھوں روپے کے نقصانات ہوتے ہیں۔

انکا کہنا تھا کہ اگر بدھنی نالے کی صفائی اچھی کی جائے اور اسکے اردگرد پشتے ڈالے جائیں تو علاقہ پانی سے محفوظ ہو سکتا ہے۔دوسری جانب متھرا، ریگی اور دیگر علاقوں میں بھی سیلاب کا پانی گھروں کے اندر داخل ہوا جس سے کافی نقصان ہوا ہے جبکہ گھروں کے گرنے کا اندیشہ بھی ہے۔

(جاری ہے)

رہائشی علاقے ورسک روڈ، درمنگی اور ریگی لارما زیر آب آنے کا خطرہ ہے، ریسکیو اور مقامی انتظامیہ کو ہائی الرٹ کیا گیا۔

نشبیی علاقوں کے رہائشی حفاظتی اقدامات یقینی بنائیں، بجلی کے کھمبوں اور زیر آب سڑکوں سے دور رہیں۔ ندی نالوں کو عبور کرنے سے گریز کریں اور مقامی انتظامیہ کی ہدایات پر عمل کریں۔ڈب، جنجالی، جمعہ خان اور چورہ خوڑ میں سیلابی صورتحال سے ناصر باغ پشاور سے متصل دیہات متاثر ہوئے۔ حیات آباد پشاور میں نرے اور موڑو خوڑ، جبکہ ناصر باغ میں پلوسے خوڑ میں بھی طغیانی آگئی۔

پشاور میں ناصرباغ، بڈھنی، ریگی للمہ، ورسک روڈ، حسن گھڑی، شاھی بالا، ملاز ی اور میاں گجر کے علاقے متاثر ہوئے۔وزیر آبپاشی عاقب اللہ خان کا کہنا تھا کہ محکمہ آبپاشی خیبر پختونخوا سیلابی صورتحال میں درکار اقدامات اٹھا رہا ہے، نہری رقبوں پر قائم تجاوزات کے خلاف سخت ایکشن لیں گے، محکمہ آبپاشی کی بروقت اقدامات کے نتیجے میں کوئی جانی نقصان نہیں ہوا تاہم گھروں و املاک کو کافی نقصان پہنچا ہے۔

دوسری جانب، حفاظتی خدشات کے پیش نظر بس ریپڈ ٹرانزٹ (بی آر ٹی) سروس کو فوری طور پر معطل کر دیا گیا ہے۔ترجمان ٹرانس پشاور کے مطابق بی آر ٹی سروس اگلی اطلاع تک مکمل طور پر بند رہے گی تاکہ مسافروں کی حفاظت کو یقینی بنایا جا سکے۔ صورتحال بہتر ہونے کے بعد سروس کی بحالی سے متعلق دوبارہ آگاہ کیا جائے گا۔