ٹی ٹونٹی رینکنگ: بابر اور رضوان ٹاپ 20 بیٹرز کی فہرست سے بھی باہر

بابر مزید تنزلی کے بعد21 اور رضوان 22 ویں نمبر پر چلے گئے، سپنر سفیان مقیم 11 درجے ترقی کر کے 22 ویں نمبر پر پہنچ گئے

ذیشان مہتاب بدھ 3 ستمبر 2025 14:22

ٹی ٹونٹی رینکنگ: بابر اور رضوان ٹاپ 20 بیٹرز کی فہرست سے بھی باہر

دبئی (اردو پوائنٹ تازہ ترین اخبار ۔ 3 ستمبر 2025ء ) پاکستان، افغانستان اور متحدہ عرب امارات کے کھلاڑیوں نے جاری سہ ملکی سیریز میں اپنی کارکردگی کے بعد تازہ ترین آئی سی سی مینز ٹی ٹونٹی رینکنگ میں نمایاں ترقی کی ہے۔

پاکستان کے مڈل آرڈر بلے باز حسن نواز 580 ریٹنگ پوائنٹس کے ساتھ دو درجے چڑھ کر 31 ویں نمبر پر پہنچ گئے جبکہ کپتان سلمان علی آغا 18 درجے کی شاندار چھلانگ لگا کر 497 پوائنٹس کے ساتھ 59 ویں نمبر پر پہنچ گئے۔

اوپننگ بلے باز فخر زمان جاری سیریز میں مشکلات کے باوجود 433 پوائنٹس کے ساتھ دو درجے ترقی کر کے 77 ویں نمبر پر پہنچ گئے۔

دریں اثناء سینئر بلے باز بابر اعظم اور محمد رضوان جو اس وقت پاکستان کے ٹی ٹونٹی پلانز سے باہر ہیں بالترتیب 21 ویں اور 22 ویں نمبر پر آ گئے جبکہ صائم ایوب بھی 558 پوائنٹس کے ساتھ دو درجے گر کر 40 ویں نمبر پر آ گئے۔

(جاری ہے)

اوپنر صاحبزادہ فرحان چار درجے تنزلی کے ساتھ 481 پوائنٹس کے ساتھ 67 ویں نمبر پر ہیں۔

افغانستان کے وکٹ کیپر بلے باز رحمن اللہ گرباز ایک درجے ترقی کے ساتھ 18 ویں جبکہ ابراہیم زدران 606 پوائنٹس کے ساتھ 12 درجے ترقی کر کے 20 ویں نمبر پر پہنچ گئے۔ تاہم تجربہ کار آل راؤنڈر محمد نبی 69 ویں، حضرت اللہ زازئی 82 ویں اور نجیب اللہ زدران 87 ویں نمبر پر پہنچ گئے۔

متحدہ عرب امارات کے کپتان محمد وسیم شاندار پرفارمنس کے بعد 591 پوائنٹس کے ساتھ پانچ درجے بہتری کے ساتھ 26 ویں نمبر پر پہنچ گئے جبکہ پاکستان کے خلاف 77 رنز بنانے والے آصف خان 13 درجے ترقی کرکے 88 ویں نمبر پر پہنچ گئے۔ اس کے برعکس عالیشان شرافو سات درجے کھسک کر 91 ویں نمبر پر آگئے۔

بیٹنگ چارٹ میں سرفہرست بھارت کے ابھیشیک شرما اور تلک ورما بدستور پہلی اور دوسری پوزیشن پر براجمان ہیں جبکہ انگلینڈ کے فل سالٹ تیسرے نمبر پر ہیں۔

باؤلنگ رینکنگ میں پاکستان کے سپنر سفیان مقیم 11 درجے ترقی کے ساتھ 594 پوائنٹس کے ساتھ 22 ویں نمبر پر پہنچ گئے جبکہ بائیں ہاتھ کے تیز گیند باز شاہین آفریدی آٹھ درجے ترقی کے ساتھ 26 ویں نمبر پر پہنچ گئے۔ حارث رؤف 4 درجے تنزلی کے ساتھ 28 ویں جبکہ عباس آفریدی 33 ویں نمبر پر آ گئے۔ سپنر محمد نواز 15 درجے بہتری کے ساتھ 521 پوائنٹس کے ساتھ 43 ویں نمبر پر ہیں۔

ابرار احمد چار درجے گر کر 66 ویں اور زخمی نائب کپتان شاداب خان 9 درجے تنزلی کے ساتھ 81 ویں نمبر پر پہنچ گئے۔

افغانستان کے لیے کپتان راشد خان نے آٹھویں پوزیشن برقرار رکھی۔ فاسٹ بولر فضل الحق فاروقی 16ویں جبکہ نوین الحق 24ویں نمبر پر ہیں۔ سپنر مجیب الرحمان 27ویں نمبر پر پہنچ گئے۔ دریں اثنا تجربہ کار محمد نبی 26 درجے کی چھلانگ لگا کر 54 ویں اور نوجوان سپنر نور احمد 49 درجے بہتری کے ساتھ 446 پوائنٹس کے ساتھ 73 ویں نمبر پر پہنچ گئے۔

عالمی سطح پر نیوزی لینڈ کے فاسٹ بولر میٹ ہنری باؤلنگ رینکنگ میں بدستور سرفہرست ہیں، انگلینڈ کے عادل رشید دوسرے اور ویسٹ انڈیز کے اسپنر عقیل ہوسین تیسرے نمبر پر ہیں۔