وفاقی حکومت کا سندھ میں نئی موٹروے بنانے کا فیصلہ

وزیراعلیٰ سندھ مراد علی شاہ سے وفاقی وزیر مواصلات علیم خان نے وفد کے ہمراہ ملاقات کی، اس ملاقات کے دوران ایم 6 موٹروے کی تعمیر اور ایم 10 موٹروے پر بھی بات چیت ہوئی

ساجد علی بدھ 3 ستمبر 2025 15:40

وفاقی حکومت کا سندھ میں نئی موٹروے بنانے کا فیصلہ

کراچی ( اُردو پوائنٹ اخبارتازہ ترین۔ 03 ستمبر 2025ء ) وفاقی حکومت کی جانب سے صوبہ سندھ میں نئی موٹروے بنانے کا فیصلہ کرلیا گیا۔ میڈیا رپورٹس کے مطابق وزیراعلیٰ سندھ مراد علی شاہ سے وفاقی وزیر مواصلات علیم خان نے وفد کے ہمراہ ملاقات کی، اس ملاقات کے دوران ایم 6 موٹروے کی تعمیر اور ایم 10 موٹروے پر بات چیت ہوئی، وزیراعلیٰ مراد علی شاہ نے شکوہ کیا کہ حیدرآباد تا سکھر ایم 6 موٹروے کو کافی عرصے سے نظر انداز کیا جا رہا ہے لیکن اب وفاقی حکومت نے ایم 6 حیدرآباد سکھر سیکشن کی منظوری دی ہے جس پر ہم شکر گزار ہیں۔

علیم خان نے بتایا کہ ’ایم 6 موٹروے حیدرآباد سکھر سیکشن 363 بلین روپے کی لاگت سے تعمیر ہوگا، نیشنل ہائی وے اتھارٹی موٹروے تعمیر کرے گی، موٹروے کو 4 سیکشن میں تقسیم کیا گیا ہے جس میں نوشہرو فیروز تا رانی پور، رانی پور تا سکھر، حیدرآباد تا ٹنڈو آدم اور ٹنڈو آدم تا نواب شاہ شامل ہے‘، جس پر وزیر اعلیٰ سندھ نے کہا کہ ’ایم 6 پر جلد کام شروع کیا جائے تاکہ عوام اور پورٹ ٹریفک کو سہولت ہو‘۔

(جاری ہے)

اس موقع پر بریفنگ میں بتایا گیا کہ کراچی اور حیدرآباد کے درمیان بھی نئی موٹروے بنانے کا فیصلہ کیا گیا ہے، کراچی تا حیدرآباد ایم 10 نئی موٹروے کا منصوبہ بن چکا ہے، نئی موٹروے کے سروے پر کام شروع ہوگیا ہے، موٹروے کا یہ سیکشن 168 کلومیٹر طویل ہوگا، نئی ایم 10 موٹروے 6 لین اور 10 انٹر چینجز پر مشتمل ہوگی، جس پر مراد علی شاہ نے اس فیصلے کو خوش آئند قرار دیتے ہوئے کہا کہ پہلے کراچی حیدرآباد سپر ہائی وے کو ہی چوڑا کرکے اس کو موٹروے کا نام دے دیا گیا تھا لیکن اب یہاں نئی موٹروے بنانے کا فیصلہ بہت اچھا ہے۔