Live Updates

وزیراعلیٰ پنجاب مریم نوازکی ہدایت پر ریلیف آپریشن کیلئے تمام وسائل دستیاب

بدھ 3 ستمبر 2025 20:55

لاہور (اُردو پوائنٹ اخبارتازہ ترین - آن لائن۔ 03 ستمبر2025ء) وزیر اعلیٰ پنجاب مریم نواز شریف کی خصوصی ہدایت پر سیلابی صورتحال کے دوران ہنگامی ریلیف آپریشن کو مؤثر انداز میں چلانے کے لیے اہم فیصلہ کیا گیا ہے۔ وزیر اعلیٰ نے ہدایت کی ہے کہ کمشنرز اور ڈپٹی کمشنرز کو محکمہ ہاؤسنگ اور واسا کے تمام وسائل بروئے کار لانے کی اجازت دی جائے تاکہ سیلاب متاثرہ علاقوں میں نکاسی آب کے عمل کو تیز اور مؤثر بنایا جا سکے۔

(جاری ہے)

ترجمان محکمہ ہاؤسنگ کے مطابق پنجاب واسا کے تمام ملازمین اور مشینری ضلعی انتظامیہ کے ڈسپوزل پر دے دی گئی ہے۔ اس حوالے سے سیکرٹری ہاؤسنگ نورالامین مینگل نے بھی متعلقہ حکام کو فوری اور مؤثر احکامات جاری کر دئیے ہیں۔ ترجمان محکمہ ہاؤسنگ کے مطابق کمشنرز اور ڈپٹی کمشنرز اب اپنی نگرانی میں عملے اور مشینری کی تعیناتی کر سکیں گے، جبکہ وسائل صوبے کے کسی بھی ڈویژن یا علاقے میں ضرورت کے مطابق استعمال کیے جا سکتے ہیں۔ ترجمان محکمہ ہاؤسنگ کے مطابق سیلاب سے متاثرہ اضلاع میں نکاسی آب آپریشن کے لیے یہ فیصلہ وقت کی اہم ضرورت تھا اور اس پر عملدرآمد میں کسی قسم کی کوتاہی یا غفلت ہرگز برداشت نہیں کی جائے گی۔