وفاق نے کراچی حیدرآباد پیکج کے تحت ایم کیو ایم ارکان اسمبلی کو 20 ارب روپے جاری کردیے

جمعرات 4 ستمبر 2025 12:28

کراچی(اُردو پوائنٹ اخبارتازہ ترین - این این آئی۔ 04 ستمبر2025ء) وفاقی حکومت نے کراچی حیدرآباد پیکج کے تحت ایم کیو ایم پاکستان کے ارکان قومی اسمبلی کے لیے 20 ارب روپے جاری کر دیے۔ایم کیو ایم پاکستان کیکراچی اور حیدرآباد سے تعلق رکھنے والے ارکان قومی اسمبلی نے اپنے اپنے علاقوں کی ترقیاتی اسکیمیں پاکستان انفرا اسٹرکچر ڈیولپمنٹ کمپنی لمیٹڈ(پی آئی ڈی سی ایل) کے پاس جمع کرا دی ہیں جس نے ان کاموں کی اسکروٹنی مکمل کر لی ہے۔

سی ڈی ڈبلیو پی سے یہ اسکیمیں گزر چکی ہیں اور جلد ایکنک سے منظوری کے بعد ٹینڈرنگ کا عمل شروع کر دیا جائے گا، یہ فنڈ کراچی کے لیے 15ارب اورحیدرآباد کے لیے 5 ارب روپے مختص کیا گیا ہے، اس فنڈ سے فلائی اوور، پانی سوریج اور سڑکوں کی تعمیر و مرمت اور عوامی دلچسپی کے دیگر منصوبے مکمل کیے جائیں گے۔

(جاری ہے)

پی آئی ڈی سی ایل ذرائع نے ناصرف یہ ترقیاتی فنڈ اکاؤنٹ میں منتقل ہونے کی تصدیق کی بلکہ بتایا کہ مسلم لیگ ن کے خیبر پختونخوا سے تعلق رکھنے والے ارکان قومی اسمبلی کے لیے بھی 3ارب روپے کا ترقیاتی فنڈ وفاق سے موصول ہو گیا ہے جبکہ سیپ کی مد میں 3 ارب روپے کا فنڈ الگ سے آیا ہے۔

اس طرح مجموعی طور پر 26 ارب روپے کی رقم جاری ہوئی ہے 20ارب کے علاوہ سیپ کے تحت پہلے ہی کراچی میں ایم کیو ایم سے تعلق رکھنے والے ارکان قومی اسمبلی کو فی رکن 25کروڑ روپے کا فنڈ دیا گیا ہے، ان اسکیموں کے کراچی میں 400 میں سے 100 کے قریب ٹینڈر اور ٹھکیداروں کو ورک آڑدر دینے کا عمل مکمل ہو چکا ہے، کراچی کے لیے وفاقی حکومت کی طرف سے جاری ہونے والے اس فنڈ سے شہر میں آئندہ کچھ عرصے میں بڑے پیمانے پر ترقیاتی کام ہوتے نظر آئیں گے۔واضح رہے کہ پی آئی ڈی سی ایل سے پہلے ارکان اسبلی کے کام وزارت ہاؤسنگ کے ماتحت پاک پی ڈبلیو ڈی انجام دیتا تھا، اس کے خاتمے کے اب وزارت ہاؤسنگ نے پی ڈی آئی ایل سی ایل قائم کیا ہے۔