جے یو آئی سندھ کا اجلاس، امن مارچ

جیکب آباد (اُردو پوائنٹ اخبارتازہ ترین - آن لائن۔ 04 ستمبر2025ء)جے یو آئی سندھ کا اجلاس، امن مارچ: 14 ستمبر کو کشمور سے آغاز، 18 ستمبر کو کراچی میں اختتام ہوگا جہاں جے یو آئی کے سربراہ مولانا فضل الرحمان خطاب کریں گی: جے یو آئی سندھ۔ کے قائد علامہ راشد محمود سومرو تفصیلات کے مطابق جمعیت علماء اسلام سندھ کی مجلس عاملہ اور مختلف اضلاع اور ٹاؤنز کے ذمہ داران کا اہم اجلاس صوبائی نائب امیر قاری محمد عثمان کی صدارت اور صوبائی سرپرست مولانا حافظ عبدالقیوم نعمانی کی میزبانی میں میں منعقد ہوا۔

اجلاس میں جے یو آئی سندھ کے قائد علامہ راشد محمود سومرو نے اپنے خطاب میں کہا کہ سندھ اس وقت بدامنی کی آماجگاہ بن چکا ہے۔ بچے، بزرگ اور خواتین تک تاوان کے لئے اغوا ہو رہے ہیں۔

(جاری ہے)

سکھر اور لاڑکانہ ڈویڑن ڈاکوؤں کے قبضے میں ہیں جبکہ حیدرآباد، میرپورخاص، نوابشاہ اور کراچی ڈویڑن میں اسٹریٹ کرائم اور لاقانونیت کی زد میں ہیں۔ حکمران اپنی عیاشیوں میں مصروف ہیں جبکہ عوام ڈاکوؤں اور مجرموں کے رحم و کرم پر چھوڑ دیے گئے ہیں۔

انہوں نے اعلان کیا کہ جے یو آئی سندھ کا امن مارچ 14 ستمبر کو کشمور سے شروع ہوگا اور 18 ستمبر کو کراچی پہنچے گا۔کشمور سے کراچی تک امن مارچ کی قیادت مولانا عبدالقیوم ہالیجوی اور علامہ راشد محمود سومرو کریں گے۔کراچی پہنچنے پر جمعیت علماء اسلام کے سربراہ مولانا فضل الرحمن مارچ کی قیادت سنبھالیں گے۔علامہ راشد محمود سومرو نے کہا کہ کشمور سے کراچی تک پورا صوبہ بدامنی کی لپیٹ میں ہے۔

اغوا برائے تاوان، ڈکیتیاں، چوریاں اور رہزنی معمول بن چکی ہیں۔ یہ صورتحال کسی بھی طور برداشت نہیں کی جائے گی۔ امن مارچ سندھ کو امن کا گہوارہ بنانے میں سنگ میل ثابت ہوگا۔اس موقع پر جے یو آئی پاکستان کے مرکزی ترجمان محمد اسلم غوری نے کہا ریاست کی سب سے پہلی ذمہ داری عوام کی جان و مال کا تحفظ ہے۔ لیکن جب حکمران اپنی ذمہ داریاں پوری کرنے میں ناکام ہو جائیں تو عوامی تحریک ناگزیر ہو جاتی ہے۔

جمعیت علمائ اسلام سندھ کے عوام کو بدامنی، ظلم اور لاقانونیت کے خلاف ایک منظم اور پرامن جدوجہد کے لئے میدان عمل میں لے کر آئے گی۔اجلاس میں صوبائی مجلس عاملہ کے اراکین حاجی عبد المالک ٹالپر، مولانا محمد غیاث، مولانا سمیع الحق سواتی، حاجی رفیق احمد سومرو، مولانا احسان اللہ ٹکروی، قاضی فخرالحسن، مولانا نور الحق، مفتی محمد خالد، مفتی عبد الحق عثمانی، مولانا عبدالرشید نعمانی سمیت مختلف اضلاع اور ٹاؤنز کے امرائ و نظمائ عمومی نے شرکت کی اور سندھ امن مارچ کی کامیابی کے لئے بھرپور عزم کا اظہار کیا۔

جے یو آئی سندھ کے پریس سیکریٹری ڈاکٹر اے جی انصاری نے کہا ہے کہ سندھ کے تمام اضلاع اور تحصیلوں میں امن مارچ کی تیاریاں زور و شور سے جاری ہیں۔ عوامی اجتماعات کے ذریعے بیداری کی مہم عروج پر ہے اور سندھ کا یہ امن مارچ عوام کے دلوں کی آواز اور صوبے کے تمام شہریوں کے تحفظ کی ضمانت ہوگا۔