حضرت محمد مصطفیﷺ کا 1500 واں یوم ولادت ہفتہ کوملک بھرمیں عقیدت و احترام کے ساتھ منایا جائے گا،

اسلام آباد (اُردو پوائنٹ اخبارتازہ ترین - اے پی پی۔ 05 ستمبر2025ء) نبی آخر الزماں حضرت محمد مصطفیﷺ کا 1500 واں یوم ولادت وفاقی دارالحکومت اسلام آباد سمیت ملک بھرمیں (کل ) ہفتہ کوعقیدت و احترام اورمذہبی جوش وجذبے کے ساتھ منایا جائے گا،وفاقی دارالحکومت اسلام آباد میں 50ویں بین الاقوامی سیرت کانفرنس منعقد ہوگی جس کا موضوع ’’سوشل میڈیا کے مفید استعمال کی تعلیم و تربیت میں ریاستی ذمہ داریاں، سیرت النبیؐ کی روشنی میں‘‘ رکھا گیا ہے ، صوبائی دارالحکومتوں میں بھی سیرت کانفرنسوں کا انعقاد کیا جائے گا، سیرت کانفرنسوں کے انعقاد کا مقصد سیرت طیبہﷺ کی عصری اہمیت کو اجاگرکرنے کے ساتھ ساتھ نوجوان نسل کی تربیت کرنا ہے ،دورِ حاضر میں جہاں نوجوان نسل کو مختلف فکری، اخلاقی اور سوشل میڈیا کے چیلنجز کا سامنا ہے، وہاں سیرتِ طیبہ ﷺکا مطالعہ ان کی شخصیت سازی، کردار کی تعمیر، اور سوشل میڈیا سمیت جدید زندگی کے ہر میدان میں رہنمائی کا ذریعہ بن سکتا ہے۔

(جاری ہے)

نبی کریمؐ کی تعلیمات ہمیں برداشت، مساوات، عدل، امانت، حیا، دیانت، مشاورت، اور خدمتِ خلق جیسے اوصاف عطا کرتی ہیں جن کی آج کے پاکستانی معاشرے میں اشد ضرورت ہے۔ سیرت النبی ﷺکے فروغ میں وزارت مذہبی امور وبین المذاہب ہم آہنگی کا کردار اور رہنمائی کلیدی حیثیت کی حامل ہے ۔ واضح رہے کہ وزارت مذہبی امور و بین المذاہب ہم آہنگی گزشتہ کئی برسوں سے ریاستی سطح پر سیرتِ طیبہ ﷺکے فروغ کے لئے ہمہ جہت اقدامات کر رہی ہے جن میں قومی سیرت مقابلہ جات، قومی وبین الاقوامی سیرت النبی کانفرنسز کا انعقاد، عشرہ رحمت للعالمین ﷺ کے پروگرامز، سیرت لٹریچر کی اشاعت، سیرت سیمینارز وغیرہ شامل ہیں۔

قابلِ ذکر بات یہ ہے کہ وزارت نے سیرت کو صرف مذہبی یا روحانی دائرہ تک محدود نہیں رکھا بلکہ اس کے سماجی، قانونی، تعلیمی اور حکومتی پہلوؤں کو بھی اجاگر کیا ہے۔قومی مقابلہ کتب و مقالات سیرت علمی خدمت کی وہ سنہری روایت ہے جس کے تحت پاکستان میں سیرت کے فروغ کے لیے وزارت مذہبی امور وبین المذاہب ہم آہنگی ہر سال قومی مقابلہ کتب و مقالات سیرت کا انعقاد کرتی ہے۔

اس مقابلے میں اردو، انگریزی، عربی اور علاقائی زبانوں میں کتب اور تحقیقی مقالات وصول کئے جاتے ہیں جنہیں ماہرین پر مشتمل کمیٹیوں کی کڑی جانچ کے بعد انعامات کے لئے منتخب کیا جاتا ہے۔ اس روایت نے پاکستانی معاشرے میں تحقیق، تصنیف اور فکری سرگرمیوں کو فروغ دیا ہے اور سیرت پر اعلیٰ سطحی علمی مواد کو عام کرنے میں بنیادی کردار ادا کیا ہے۔

1500ویں میلاد مصطفیؐ اور 50 ویں بین الاقوامی سیرت النبیؐ کانفرنس کی مناسبت سے تقریبات کے انعقاد اہل ایمان کو اپنے نبی حضرت محمد مصطفیٰؐ کی ولادتِ باسعادت کی یاد دلا کر روحانی تازگی، عقیدت اور اصلاحِ احوال کا پیغام دیتا ہے۔ نبی کریمؐ کی ذاتِ اقدس انسانیت کے لئے سراپا رحمت ہے جن کی سیرت، زندگی کے ہر دینی، سماجی، سیاسی، معاشی اور قانونی پہلو کے لئے کامل رہنمائی فراہم کرتی ہے۔

ربیع الاول سال 1447ھ کی آمد اس لحاظ سے بھی غیر معمولی اہمیت کی حامل ہے کہ یہ ہجری تقویم میں نبی کریمؐ کی1500 ویں ولادت باسعادت کا سال ہے۔ اس موقع کو نمایاں طور پر منانے کے لئے اسلامی تعاون تنظیم (او آئی سی) نے اسے نبی پاک کا 1500ویں یوم ولادت کا سال قرار دیا ہے اور ایک قراداد کے ذریعہ رکن ممالک پر زور دیا گیا ہے کہ اس سال کو شایان شان طریقہ سے منایا جائے اور تمام رکن ممالک کو علمی، تعلیمی، سماجی اور میڈیا سرگرمیوں کے ذریعے اس موقع پر آپؐ کی ذات عالی کو ہدیہ تبریک پیش کرنے اور آپؐ کی سیرت کو اجاگر کرنے کی ہدایت کی ہے۔

قومی و مرکزی تقریبات کے سلسلے میں اسلام آباد میں وفاقی وزارت مذہبی امور و بین المذاہب ہم آہنگی کے زیر انتظام مختلف نوعیت کی تقاریب منعقد ہوں گی جن میں سرفہرست 12 ربیع الاول کو جناح کنونشن سینٹر میں منعقد ہونے والی 50 ویں بین الاقوامی سیرت النبیؐ کانفرنس ہے۔ اس تاریخی کانفرنس میں اسلامی دنیا سے معروف علمائے کرام، سکالرز، محققین، سفرا، ممبران پارلیمنٹ، سول سوسائٹی اور نوجوان نسل کی شرکت متوقع ہے۔

اس سال کانفرنس کا موضوع ’’سوشل میڈیا کے مفید استعمال کی تعلیم و تربیت میں ریاستی ذمہ داریاں، سیرت النبیؐ کی روشنی میں‘‘ رکھا گیا ہے ۔ علاوہ ازیں قومی مقابلہ کتب سیرت و نعت 2025ء کی تقریب تقسیم انعامات کا انعقاد بھی ہو گا جس میں خوش نصیب مصنفین، نعت گو شعرا، اور مقالہ نگار کو نقد انعامات ، اعزازی شیلڈز اور اسناد سے نوازا جائے گا۔

نمایاں ترین انعامات بین الاقوامی سیرت النبیؐ کانفرنس میں دیئے جائیں گے۔اس ضمن میں صوبائی و ضلعی سطح پر سیرت کانفرنسز، محافلِ نعت، سیمینارز، اور بین المذاہب مکالمے ہوں گے۔ 12 ربیع الاول کو وفاقی دارالحکومت میں 31 اور صوبائی دارالحکومتوں میں21 توپوں کی سلامی دی جائے گی۔ وزارت مذہبی امور کا کہنا ہے کہ عشرہ رحمت للعالمینؐ 2025ء نہ صرف نبی کریمؐ کی1500 ویں ولادت باسعادت کا موقع ہے بلکہ پاکستان کی ریاستی، علمی، تعلیمی، فکری اور دینی یکجہتی کا مظہر بھی ہے۔ یہ عشرہ ہمیں اپنے قول و عمل کو تعلیماتِ نبویؐ کے تابع کرنے، نوجوان نسل کو ڈیجیٹل اخلاقیات کا شعور دینے اور بین الاقوامی سطح پر پاکستان کے مثبت اسلامی تشخص کو اجاگر کرنے کا بہترین موقع فراہم کرتا ہے۔\395