ملک میں ضروری اشیاء کی قیمتوں میں ہفتہ وار بنیادوں پر 1.29 فیصد، سالانہ بنیادوں پر 5.07 فیصد اضافہ

جمعہ 5 ستمبر 2025 15:00

اسلام آباد (اُردو پوائنٹ اخبارتازہ ترین - اے پی پی۔ 05 ستمبر2025ء) ملک میں ضروری اشیاء کی قیمتوں میں ہفتہ وار بنیادوں پر 1.29 فیصد اور سالانہ بنیادوں پر 5.07 فیصد اضافہ ریکارڈ کیا گیا ہے، گذشتہ ہفتہ کے دوران چار ضروری اشیاء کی قیمتوں میں کمی اور 24 کی قیمتوں میں استحکام رہا، اس کے برعکس 23 اشیاء کی قیمتوں میں اضافہ ریکارڈ کیا گیا۔ پاکستان ادارہ شماریات کی جانب سے قیمتوں کے حساس اشاریہ بارے ہفتہ وار رپورٹ کے مطابق 4 ستمبر کو ختم ہونے والے ہفتہ میں صارفین کیلئے قیمتوں کا حساس اشاریہ 335.41 پوائنٹس ریکارڈ کیا گیا جو پیوستہ ہفتہ کے مقابلہ میں 1.29 فیصد زیادہ ہے۔

پیوستہ ہفتہ میں صارفین کیلئے قیمتوں کا حساس اشاریہ 331.4 پوائنٹس ریکارڈ کیا گیا۔ گذشتہ ہفتہ کے دوران کیلے کی قیمت میں 3.86 فیصد، ڈیزل 0.91 فیصد، چینی 0.13 فیصد اور سرسوں کے تیل کی قیمت میں 0.10 فیصد کی کمی ہوئی۔

(جاری ہے)

اس کے برعکس ٹماٹر کی قیمت میں 46.02 فیصد، آٹا 25.41 فیصد، پیاز 8.57، ٹوٹا باسمتی چاول 2.62، لہسن 2.04 فیصد، آلو 1.38 فیصد، دال مونگ 1.29 فیصد، بریڈ 1.19 فیصد، ایل پی جی 0.88 فیصد، شرٹنگ 0.27 فیصد، لانگ کلاتھ 0.17 فیصد اور پرنٹڈ لان کی قیمت میں 0.07 فیصد اضافہ ہوا۔

سب سے کم یعنی 17 ہزار 732 روپے ماہوار آمدنی رکھنے والے گروپ کیلئے قیمتوں کے حساس اشاریہ میں 2.01 فیصد اضافہ ریکارڈ کیا گیا۔ 17 ہزار 733 روپے سے لے کر 22 ہزار 888 روپے، 22 ہزار 889 روپے سے لے کر 29 ہزار 517 روپے، 29 ہزار 518 روپے سے لے کر 44 ہزار 175 روپے اور اس سے زیادہ ماہوار آمدنی رکھنے والے گروپوں کیلئے قیمتوں کے حساس اشاریہ میں بالترتیب 1.90 فیصد، 1.61 فیصد، 1.48 فیصد اور 0.99 فیصد کا اضافہ ہوا۔ صارفین کیلئے قیمتوں کے حساس اشاریہ کا تعین ملک کے 17 بڑے شہروں کی 50 مارکیٹوں میں 51 ضروری اشیاء کی قیمتوں میں کمی بیشی کی بنیاد پر کیا جاتا ہے۔