ووٹر ایجوکیشن کمیٹیاں عوام میں ووٹ سے متعلق آگاہی کے حوالہ سے نمایاں کردار ادا کر رہی ہیں، محمد فرید آفریدی

جمعہ 5 ستمبر 2025 16:50

پشاور (اُردو پوائنٹ اخبارتازہ ترین - اے پی پی۔ 05 ستمبر2025ء) جوائنٹ صوبائی الیکشن کمشنر محمد فر ید آفریدی نے کہا ہے کہ اضلاع کی سطح پر ووٹر ایجوکیشن کمیٹیاں عوام میں ووٹ سے متعلق آگاہی کے حوالہ سے نمایاں کردار ادا کر رہی ہیں۔ ان خیالات کا اظہار انہوں نے الیکشن کمیشن کی جانب سے ڈسٹرکٹ ووٹرز کا ششماہی کیلنڈر پروگرام( فروری 2025 تا جولائی 2025) کے حوالہ سے خصوصی جائزہ اجلاس کی صدارت کرتے ہوئے کیا۔

تر جمان صوبائی الیکشن کمیشن خیبرپختونخوا کے مطابق اجلاس میں تمام اضلاع کے ڈسٹرکٹ الیکشن کمشنرز نے شرکت کی، ڈائریکٹر میڈیا کو آرڈینیشن الیکشن کمیشن سیکرٹیریٹ دریا عامر نے ششماہی کیلنڈر پر تفصیلی بریفنگ دی، اسسٹنٹ ڈائریکٹر الیکٹورل رول مس صدف بھی اس موقع پر موجود تھیں۔

(جاری ہے)

جوائنٹ صوبائی الیکشن کمشنر نے بتایا کہ ڈسٹرکٹ ووٹرز ایجوکیشن کمیٹیاں ڈسٹرکٹ الیکشن کمشنر کی سربراہی میں ووٹرز آگاہی مہم کے سلسلے میں کام کررہی ہیں،جس میں متعلقہ ضلع کے ہر طبقہ سے تعلق رکھنے والے افراد شامل ہوتے ہیں۔

انہوں نے کہا کہ الیکشن کمیشن آف پاکستان کی میڈیا کوآرڈینیشن و آئوٹ ریچ ونگ نے اس سال جو ششماہی سرگرمیوں پر مبنی کیلنڈر دیا اس پر من و عن عمل کیا گیا۔محمد فرید آفریدی نے امید ظاہر کی کہ تمام ڈسٹرکٹ الیکشن کمشنرز معروضی حالات کو مدنظر رکھ کر آئندہ سہ ماہی کیلنڈر تشکیل دینے کے لئے ٹھوس اور قابل عمل تجاویز دیں گے تاکہ تمام طبقات کی انتخابی عمل میں شمولیت اور آئندہ عام انتخابات میں ووٹرز بالخصوص خواتین کے ٹرن آوٹ میں اضافہ کے لِئے ان کی ذمہ داریوں کے بارے میں آگاہی دی جاسکے۔

جوائنٹ صوبائی الیکشن کمشنر نے کہا کہ الیکشن کمیشن آف پاکستان نے خیبرپختونخوا میں 19 اکتوبر 2025 کو ویلیج و نائبرہوڈ کونسلوں میں مختلف خالی نشستوں پر بلدیاتی انتخابات کا اعلان کیا ہے۔ توقع ہے کہ ووٹرایجوکیشن کمیٹیاں ووٹ کی اہمیت سے متعلق آگاہی دینے کا سلسلہ جاری رکھے گی، آخر میں جملہ افسران نے اگلے سہ ماہی پروگرام کے حوالہ سے تجاویز دیں۔