Live Updates

سینیٹر روبینہ خالد کی زیر صدارت کے پی کے خواتین ونگ کا اجلاس ،خواتین ونگ کی گزشتہ کارکردگی پر تفصیلی بحث کی گئی

جمعہ 5 ستمبر 2025 19:45

اسلام آباد (اُردو پوائنٹ اخبارتازہ ترین - این این آئی۔ 05 ستمبر2025ء)بے نظیر انکم سپورٹ پروگرام کی چیئرپرسن سینیٹر روبینہ خالد کی صدارت میں پاکستان پیپلز پارٹی خواتین ونگ خیبرپختونخوا کابینہ کا اہم اجلاس منعقد ہوا۔ اجلاس میں خواتین ونگ کی گزشتہ کارکردگی پر تفصیلی بحث کی گئی اور ایک جامع رپورٹ بھی پیش کی گئی۔اجلاس سے خطاب کرتے ہوئے سینیٹر روبینہ خالد نے ہدایت دی کہ خیبرپختونخوا کے سیلاب زدہ علاقوں میں فوری طور پر امدادی کیمپ قائم کیے جائیں اور متاثرہ خاندانوں کو ہر ممکن امداد فراہم کی جائے۔

(جاری ہے)

انہوں نے کہا کہ متاثرین سیلاب کی بحالی اور ان تک بنیادی سہولتوں کی فراہمی پیپلز پارٹی کی اولین ترجیح ہے اور خواتین ونگ کو اس سلسلے میں کلیدی کردار ادا کرنا ہوگا۔اجلاس میں تنظیمی ڈھانچے کو مزید فعال بنانے، کارکنان کے مسائل کے حل اور آئندہ سیاسی حکمتِ عملی پر بھی غور کیا گیا۔ سینیٹر روبینہ خالد نے اس موقع پر کہا کہ خواتین ونگ پارٹی کا اہم ستون ہے اور اسے مزید مؤثر کردار ادا کرنے کے لیے متحرک کیا جائے گا۔ انہوں نے اس بات پر زور دیا کہ پارٹی کی خواتین رہنما اور کارکنان عوامی رابطے میں اضافہ کریں تاکہ پارٹی کا پیغام گھر گھر پہنچایا جا سکے۔