ح* پشاور ، الیکشن کمیشن کی ششماہی کیلنڈر سرگرمیوں کا خصوصی جائزہ اجلاس

کمیٹیوں کا مقصد تمام طبقات کی شمولیت اور خواتین ووٹرز کے ٹرن آؤٹ میں اضافہ ہے، محمد فرید آفریدی ً 19 اکتوبر کو ویلیج و نائبرہوڈ کونسلوں کی خالی نشستوں پر بلدیاتی انتخابات ہوں گے،صوبائی الیکشن کمشنر

جمعہ 5 ستمبر 2025 19:50

پشاور (اُردو پوائنٹ اخبارتازہ ترین - آن لائن۔ 05 ستمبر2025ء) جوائنٹ صوبائی الیکشن کمشنر خیبرپختونخوا محمد فرید آفریدی نے کہا ہے کہ اضلاع کی سطح پر قائم ووٹر ایجوکیشن کمیٹیاں عوام میں ووٹ کی اہمیت سے متعلق آگاہی دینے میں مؤثر کردار ادا کر رہی ہیں۔یہ بات انہوں نے الیکشن کمیشن کی جانب سے ڈسٹرکٹ ووٹرز ششماہی کیلنڈر پروگرام (فروری تا جولائی 2025) کے جائزہ اجلاس سے خطاب کرتے ہوئے کہی، جس میں تمام اضلاع کے ڈسٹرکٹ الیکشن کمشنرز نے شرکت کی۔

اجلاس میں ڈائریکٹر میڈیا کوآرڈینیشن الیکشن کمیشن سیکرٹریٹ مس دریا عامر نے کیلنڈر سرگرمیوں پر تفصیلی بریفنگ دی۔محمد فرید آفریدی نے بتایا کہ ڈسٹرکٹ ووٹر ایجوکیشن کمیٹیاں ڈسٹرکٹ الیکشن کمشنر کی سربراہی میں کام کر رہی ہیں، جن میں متعلقہ اضلاع کے مختلف طبقات سے تعلق رکھنے والے افراد شامل ہیں۔

(جاری ہے)

ان کمیٹیوں کا بنیادی مقصد ووٹرز، بالخصوص خواتین، کو انتخابی عمل میں شمولیت کی ترغیب دینا اور آئندہ عام انتخابات میں ٹرن آؤٹ بڑھانا ہے۔

انہوں نے کہا کہ خیبرپختونخوا میں ششماہی سرگرمیوں پر مبنی کیلنڈر پر من و عن عمل کیا گیا ہے اور امید ہے کہ تمام ڈسٹرکٹ الیکشن کمشنرز آئندہ سہ ماہی کیلنڈر کے لیے معروضی حالات کو مدنظر رکھتے ہوئے ٹھوس اور قابلِ عمل تجاویز پیش کریں گے۔اجلاس میں بتایا گیا کہ الیکشن کمیشن آف پاکستان نے خیبرپختونخوا میں 19 اکتوبر 2025 کو ویلیج و نائبرہوڈ کونسلوں کی مختلف خالی نشستوں پر تیسرے بلدیاتی انتخابات کا اعلان کیا ہے۔فرید آفریدی نے اس عزم کا اظہار کیا کہ ووٹر ایجوکیشن کمیٹیاں مستقبل میں بھی ووٹ کی اہمیت اور شہری ذمہ داریوں سے متعلق عوامی آگاہی کا سلسلہ جاری رکھیں گی۔