Live Updates

حکومت کا سیلاب متاثرین کیلئے بجلی کے بلوں میں ریلیف کا فیصلہ

جنرل سیلز ٹیکس، ایف سی سرچارج اور فکس چارجز ختم کرنے پر غور جاری، فیول پرائس ایڈجسٹمنٹ پر جنرل سیلز ٹیکس اور ایکسائز ڈیوٹی کے خاتمے کی بھی تجویز ہے؛ رپورٹ

ساجد علی منگل 9 ستمبر 2025 13:22

حکومت کا سیلاب متاثرین کیلئے بجلی کے بلوں میں ریلیف کا فیصلہ

اسلام آباد ( اُردو پوائنٹ اخبارتازہ ترین۔ 09 ستمبر2025ء ) وفاقی حکومت کی جانب سے سیلاب متاثرین کو بجلی کے بلوں میں ریلیف دینے کا فیصلہ کیا گیا ہے۔ جیو نیوز کے مطابق ذرائع کا کہنا ہے کہ وفاقی حکومت سیلاب متاثرین کے لیے بجلی کے بلوں پر جنرل سیلز ٹیکس، ایف سی سرچارج اور فکس چارجز ختم کرنے پر غور کررہی ہے، فیول پرائس ایڈجسٹمنٹ پرجنرل سیلز ٹیکس اور ایکسائز ڈیوٹی کے خاتمے کی بھی تجویز ہے، اس کے علاوہ بجلی کے بلوں پر انکم ٹیکس، مزید اور فاضل ٹیکس سمیت ریٹیلر سیلز ٹیکس ختم کیے جانے کا بھی امکان ہے۔

اس حوالے سے تصدیق کرتے ہوئے وفاقی وزیر غذائی تحفظ رانا تنویر حسین نے بتایا کہ فوی طور پر سیلاب متاثرین کے بلوں پر ٹیکس معاف کیے جائیں گے، سیلاب متاثرین کے بجلی کے بلوں پر ٹیکس ختم کرنے کیلئے کام کیا جارہا ہے، بجلی کے بلوں میں ریلیف وفاقی حکومت دے گی، لینڈ ریونیو صوبائی حکومت معاف کرے گی، سیلاب زدہ علاقوں میں بجلی کے اضافی بلوں کا نوٹس لیں گے، یہ وہ بل ہوں گے جو پہلے ہی پرنٹ ہوچکے ہیں۔

(جاری ہے)

انہوں نے مزید کہا کہ سیلاب متاثرین کو ریلیف دینے کے لیے جو ہوسکا وہ کیا جائے گا، سیلاب متاثرہ علاقوں کا سروے مکمل ہوتے ہی کسان پیکج کا اعلان بھی کریں گے، اس سلسلے میں رواں ماہ کے وسط تک سیلاب متاثرہ علاقوں کا سروے مکمل کرلیا جائے گا، اس کے علاوہ سیلاب سے متاثرہ علاقوں میں فصلوں کے نقصانات کا ابتدائی ڈیٹا مرتب کرلیا گیا ہے، سیلاب میں ہر فصل کا ایک سے تین فیصد تک نقصان ہوچکا ہے، ان میں سب سے زیادہ گوجرانوالہ ڈویژن میں فصلوں کا 18 فیصد تک نقصان ہوا جہاں دھان کی فصل کا سب سے زیادہ نقصان ہوا ہے۔