صرف ایک ماہ میں شہباز شریف حکومت نے 1830 ارب روپے کا قرضہ لیا، مزمل اسلم

منگل 9 ستمبر 2025 16:47

اسلام آباد(اُردو پوائنٹ اخبارتازہ ترین - این این آئی۔ 09 ستمبر2025ء)مشیر خزانہ خیبرپختونخوا مزمل اسلم نے کہا ہے کہ صرف ایک ماہ میں شہباز شریف کی حکومت نے 1830 ارب روپے کا قرضہ لیا۔اپنے ایک بیان میں مزمل اسلم نے کہا کہ کیسے ملک کی معیشت اچھی ہو رہی ہی پاکستان کا مجموعی قرضہ 78،000 ارب روپے کے قریب پہنچ چکا ہے، سوا تین سال میں شہباز شریف کی حکومت اب تک 34،500 ارب روپے کا قرضہ لے چکی۔

(جاری ہے)

مزمل اسلم نے کہا کہ جب شہباز شریف حکومت میں آئے تو ملک کا قرضہ 43500 ارب روپے تھا، شہباز شریف ملکی قرضہ کم کرنے آئے تھے مگر اب قرضہ لینے کی تاریخ رقم کردی۔انہوںنے کہاکہ شہباز شریف کی حکومت کے دوران ملک کے مجموعی قرضے میں 79 فیصد کا اضافہ ہوا، ملک چلانے کے لیے 75 سال میں جو قرضہ لیا گیا اب اس کا 80 فیصد 3 سالوں میں لیا گیا۔مزمل اسلم نے کہا کہ 3 سالوں میں ملک میں ترقیاتی کاموں کی ایک اینٹ بھی نہیں لگی، حالت یہ ہے کہ اسٹیٹ بینک مارکیٹ سے ڈالرز خرید رہا ہے۔مشیر خزانہ خیبرپختونخوا نے کہا کہ سرمایہ کاری تو چھوڑیں کوئی قرض بھی نہیں دے رہا۔