سیاسی اختلافات اپنی جگہ، مگر ذاتی حملے قابل قبول نہیں:سپیکر پنجاب اسمبلی

منگل 9 ستمبر 2025 22:34

لاہور (اُردو پوائنٹ اخبارتازہ ترین - آن لائن۔ 09 ستمبر2025ء) سپیکر پنجاب اسمبلی ملک محمد احمد خان نے کہا ہے کہ اپوزیشن کے انتخابی عمل کا بائیکاٹ ان کا سیاسی فیصلہ اور صوابدید ہے۔سپیکر نے اسمبلی اجلاس کے دوران میڈیا سے غیر رسمی گفتگو میں بتایا کہ اپوزیشن نے اگرچہ بائیکاٹ کا اعلان کیا، لیکن اپنا امیدوار الیکشن کمیشن سے ریٹائر نہیں کیا، جس کے باعث انتخابی عمل کرانا ضروری ہو گیا۔

انہوں نے کہا کہ وہ سیاسی عمل کے حامی ہیں اور بائیکاٹ جیسے فیصلے عوامی نمائندگی اور حقوق سے دوری کا باعث بنتے ہیں۔ملک محمد احمد خان نے میاں نواز شریف کے ساتھ ہونے والے سلوک پر شدید تحفظات کا اظہار کیا اور کہا کہ ان پر جتنا انتقام لیا گیا، اتنی زیادتی کسی اور سیاسی رہنما کے ساتھ نہیں ہوئی۔

(جاری ہے)

ن لیگ کے رہنماو ں پر ناجائز مقدمات بنائے گئے اور ان کے گھر جلائے گئے۔

سپیکر نے 9 مئی کے واقعات کا حوالہ دیتے ہوئے کہا کہ ریاست پر حملہ کیا گیا، کور کمانڈر کے گھر اور رانا ثناء اللہ کے گھر پر حملہ ہوا، جو ایک خطرناک رجحان ہے اور اس کی مذمت ہونی چاہئے۔انہوں نے علیمہ خان پر انڈا پھینکے جانے کی شدید مذمت کی اور کہا کہ جس نے بھی یہ حرکت کی ہے، اس کے خلاف سخت کارروائی ہونی چاہئے۔ سپیکر نے کہا کہ سیاسی اختلافات اپنی جگہ، مگر ذاتی حملے قابل قبول نہیں۔